Rara ajunga ya teburtem ajanga adoker: Maneka Gandhi

 

New Delhi, September 14 (Agencies): Mangatettep ken o adoktsüsa tanü Women & Child development minister Maneka Gandhi-i, teburtem shilem angatetdaktsütsü ya tasak aser kanga tebenja, kechiyong “rara ajunga ya teburtem nungi adoker,” ta ashi.

Taküm July ita nung ministry-i tenzükba ‘#100Women’ mapatong dak sentakba nung Facebook ajanga tamshirtemi asüngdangba ka langzüdang Maneka-i, “Teburtem shilem angatetdaktsütsü ya tasak aser kanga tebenja, kechiyong rara ajunga ya teburtem nungi adoker. Onoki school tem nung ‘Gender Champions’ benokogo, aser iba kübok tetsürtem akhümtsübur aser yarir teburtem nem sempet agütsütsü,” ta ashi.

‘#100Women’  mapatong asoshi ministry-i social media sabang, Facebook teyari agia linük nung pei kin/nübur loktiliba nung temelenshi adokdaktsür tetsür 100 shimtsü.

Facebook amshirtem den sensasemba mapang Gandhi dang tanurtem shisaliok, anema alibaren, tetsürtem anema inyakbatem aser yimtenren dak sentakba onüktem nung tasüngdangba aika asüngdanga liasü, ajisüaka lai tasüngdangba ishika dang langzü.

Haryana, Gurgaon nung Saudi Arabia ketdangser kati Nepal tsür kilir ana tashiyim amshia raksatsüba dak sentakba nung Maneka Gandhi-i, iba ya tenük lapokba ka lir aser tarutsü nung item tatalokba malitsü atema Centre sorkari inyaktsü, ta ashi.

Protection of Women from Domestic Violence Act, 2005 dak sentakba nung Union minister-i, “Onok dangi mapang shia state tem nungi osang angur iba den külemi National Commission for Women aser police den onoki senteper inyaker,” ta ashi.

Ministry-isa “Sakhi” nüngja nung ‘One Stop Centre tem’ lapoktsü, koba ajanga timtem ajurur tetsürtem yariba nung tongtibang shilem agitsü, ta laisa ashi.

School tem nung makamiter chirtem atema menden wazüktsüba dak sentakba nung lai, item ama kibong nungi adoker tanurtemji school tajung nung züngdaktsütsüji kanga tongtibang, ta ashi.

Laisa, India nung minute tenet shia school ka lapoktsü nüngdaker, ta ashi.