New Delhi, Sept 01 (Agencies): 1965 küm India-Pakistan raraba sülen küm 100 ajungba dak sentakba nung Mongolbar nü Tri Service Seminar nung jembidang Chief of Army Staff, Dalbir Singh-i, Pakistan nungeri linük telungi aiter aser maneni ceasefire temzüng alema inyaker, anungji rara tatsü asoshi mitkartem renema alitsüla, ta ashi.
“Mapang tatsü-tsü raraji aoksa mapang tatsüka tsüngda adoker ta onoki meteta lir. Iba ya ajanga asenok mapang ajak nung high level nung renema alitsü nüngdak, iba ya asen asalendong nung kanga tongtibang kümogo,” ta tanü New Delhi nung Singh-i ashi.
Paisa, Pakistan-i ceasefire alema inyakba kanga buluba ajanga Indian Army kanga yakyaka kümogo, ta ashi.
“Asenok amokmerenba aser asenoki ajuruba tayongzükbatem ya kanga tebenja kümogo. Tesüiba küm ishika nung Indian Army kanga yakyaka kümogo. Anüolen asen kidangeri litsü telungi aitba aser ceasefire alema inyakba kanga bulua akümba ajanga arrtsülen kanga yakyaka kümogo. J&K nung mepetmesü adokdaktsütsü asoshi tasa tasen maneni amshir. Tawa kiralongrartemi lendong agütsübatem ajanga tanga tesemtem nunga parnoki timtem agütsütsü nükjidong temaitsü sayur, ta Songh-i ashi.
1965 küm rara nung India linük asoshi taküm bendanga agüja asür sepaitem nem Singh-i akhüm tetushi agütsüogo.
“1965 rara nung India mitkartemi tali tasü ita raraba, tali shisanga inyaktetba aser nükjidong tulu nung raraba ya otsü ka lir. Tongtibangtibaji India mitkartemi Pakistan western front junga maktetogo. Iba rara ajanga asenoki tanaben tamang koktetogo aser küm trok sülen 1971 nunga takok ngutet,” ta paisa ashi.
You must be logged in to post a comment Login