Raraba osettem ayoki aru

Tang US tir Donald Trump India-i aruba yabo tanga nüngdak atema masü saka raraba oset ayoki aru südi ta angatetter aser taru langa India den US nungertemi yangluba injang prangpong den rara dang amshiba tayimtsü dena US sen dollar billion 3 jenjang India-i alitsü renemogo. Pa India tonger Ahmedabad nung lokti senden tuluka nung jembidang, alima nung yangluteta akaba raraba osettem rongnung US-i yangluba osettemsa tajungba aser item raraba osettemji amshia alima tesem aika nung kiralongrartem mali küma samatsüogo ta metetdaktsü. Paisa Pakistan lima nunga kiralongraba mapatem nokdangtsü asoshi Pakistan yimten den jembidagi ta shisem. Item otemji kodang jungjunga bilemdangdir, India-i pa aruba nükjidong ashiba liasü ta angatettsü. Iba jagi Donald Trump ya yimten lenir ka dang masü saka shishilembar-a tajung ka ta angatetogo. Atangji, India asoshi raraba osettem tesashi aser tajung peria akatsü nüngdaker, kechiyong külen China-i aser külen Pakistan-i India kanga nükenbelemdaktsür. Donald Trumpi India dang raraba oset yoktetba kuli kaji aji liasü. Ano, talisa tang ama tamangba yimsü tsütsü alima tsüngdang India tejak metentettsüsa atalokba mapang India asoshi US den tesendaktep junga alitsübaji kanga tongtibang lir, ibayongji nüngdakba agidang masü saka jungtepnüba agi ato kiloner Narendra Modii tir Donald Trump dang nungi pai ayokba raraba osettemji ali südi. Iba amaji pei pei ajangzüktsü kija bilema meinyak nungbo, tang linük rongsenren tia yagibo sen paika jagi raraba oset alitsüsabo masü. Yakanü India nung aruagi lokti senden nung jembidang, US tir Donald Trump-i parnoki yangluba raraba osettem ajungba aser Narendra Modii junga yimsü asüba indang tenüng kanga sanga jembiogo. Ajisüaka, pa India nung aruagi India ato kilonser den raraba osettem ayoktsü jembidang, Delhi nungbo police dena nisung metsü dak tali asütsüsa nübortem rongnung rongrong adoka azü tokshiba, ki aser gari rongdoktsüba tatalokbatembo kenyongi mangashi aser mangu amai pelatepa amongbaji ajak asoshi tia majung asütsü. Delhi nung Hindu aser Muslim na tsüngda rarar amai azütokshitepa rarateper aser luagi Ahmedabad nungbo India nung tamangba yimsü ajak kecha tetsübu melii sademsadema amangtetter ta jembibaji Donald Trump asoshi kanga mebilemdangi jembiba o ka asütsü. Ashi, pai Ahmedabad nungi o tajung ka shitsü asübo, tang tashi Delhi nung tamangba yimsü balala amangba teloktem rongnung Citizenship Amendment Act (CAA) aginür o maginür na tsüngda yamai lendong tuluba ataloka moula. Akhidang, Rome yimti arongdang, Nero chubabo jemji apua ken tena tsüngsanga kazüa liasü ta asüba amato, Delhi nung nisung süa kiojen arongbaa mangashii kati ka sangtepa kazübaji Hindu nunger yimsüsür tajunga memesük aser Khrista dak amangba yimsüsür tajunga masü. Pei lima nung pei alidak nübortem nok nü aser prangpong amer kima yimdong nung azütokshitepa raratepdang tangar kintem den raratsü asoshi sen billion asem tashi endoka raraba oset alibaji ngasangatem mapa tuluka lir. India yimten nüchiso anguba küm 1947 küm Hindu nunger o Muslim nunger na azü tokshitepa raraba aser 1984 küm Indira Gandhi kasetba sülen Delhi nung Sikh nungertem anema tashiyim agi azü tokshi mapa inyakba den kasa tia tanü Delhi nung ajurudagi. Linük nung ato kilonseri anir asüng India koma tajungba aotsü ta bilema jembir masü saka India yimten nüchiso mangudang nungi India nunger lenirtem rongnung arishitepa aruba indang tejen otsü tamajungtem, shitak asü tiyazüar memetet, kakshia jembir. Iba jagi nisungtem mulung menendaktsür aser tsükchitep tenzükdaktsür. Yimten leniri anir, nübortem dang oang tashiyim mapa inyakang, injang kalokjang aser ola tadoktsü ta shia anira, iba yimten aser telokjibo kodanga mulung süngjema malitsü aser nübortem rongnung temulung melemtep adoktsü, majinüteptsü aser mangyangnütsü.. Itemji tangatetba mulungsentsü adenertem (Educated mind) masü. Tanü India nung yimten lenirtemi item tejen otsü kakshia tamajung jembiba agi nübortem ain adokdaktsür. Tang amai India nungbo ozüng maka amai yimdong nung nübortem azütokshitepa raradaktsüra, US dang aliba raraba osettemji tangar kintem den raradang masü saka pei nübortem anema amshitsüsa akümtsü. Ashiko, mekümdangra, tang ama tia yagi linük nung sepaitem rongnung telemsa adoktsü aser lendong tulu ataloktsü.