Raradang amshiba rong ka küm 600 sülen Britain nung angu

London, October 12 (Agencies): Hampshire, Britain ayong ka nung raradang amshiba rong ka küm 600 sülen   raksar aliba angu, ta media osang ka ajanga Hombar nü metetdaktsü.

Iba rong tenüng Holigost, koba King Henry V nem yanglutsüba rong pezü rongnung tanabuba lir. Iba rong ya King Henry V-i France amaktsü asoshi amshia liasü, ta Telegraph osang ajanga metetdaktsü.

Holigost ya November 17, 1415 nü nungi chubar rong rongnung züngoka amshi meso aser 1416 nungi 1420 tsüngda tongtibang rara ana nung shilem agia liasü. Iba rara ya küm noklang junga rara liasü.

1416 küm Harfleur rara nung iba rong ya Duke of Bedford asoshi lenniba rong ka ama amshia arudang kanga mejungi raksa. Iba den külem ano Earls of Devon aser Dorset nungeria rara balala nung kasa rong ya amshi.

Britain nung tesüiba mapang sobaliba otsü aser oset wazüka ayur, ‘Historic England’ teloki Hamble ayong nung anguba iba raradang amshiba rong kanga junga bushisüngdangtsü. Iba dak sentakba nung archaeologists temi “sonar, remote sensing, drone technology aser dendrochronology” amshia iba rong indang ajak metettsü merangtsü.

1416 küm iba rong ya nisung 200-i aia liasü, ajisüaka ano raratsüpur sepaia 240 shibo asem.

Historic England nung tekolakba, Duncan Wilson, “Iba rara mapang Agincourt rara ajanga linük asoshi temelenshi tulu bentsür aru,” ta ashi.

“Küm 600 tain rong saksa ka bushisüngdangtsüji kanga jangratemtsüka asütsü,” ta pai shisem.

Marine archaeologists temi ashiba agi, iba rong ngutetba ajanga 15th century mapang King Henry’er sepaitem indang taküm tali jangjatsü meteta akümtsü.