Raradang asürtem bilemtettsüla:Obama

Washington, May 31 (Agencies) : Linük atema raradang asürtem bilemteta amongba anogo, May 30, 2016 nü US Tir Barack Obama-i Arlington National Cemetery semdanga asür sepaitem nem akhümtsübo agütsü.
Vietnam rara tembangba sülen asürtem bilemteta amongba anogo nung iba rara nung taküm kümzüka alir nisung taintemi parnok rara mapang okrongba aser parnoki meima alirtem taküm samaba bilemteter, ta EFE osang ajanga ashi.
Asürtem nem akhümtsübu agütsüba sentong ya Arlington nung agi. US atema raradang asürtem nisung meyirjang aika iba tesem nung rema lir aser “Tomb of the Unknown Soldier” nung Obama-i anir rara nung asürtem aremba tesem nung naro yutsü yonga ao.
Naro yutsüba sülen Tir Obama-i o tatsüka jembia liasü. O jembidang pai, iba leper nung rema aliba asür sepaitem aser parnok kinungertemi asenok dang nungi kecha meimlar ajisüaka parnok bilemtettsü imlar, ta ashi.
“Yangi aliba America nunger asürtem aser kinungertemi asen lima asoshi tajungtiba inyaktsüogo aser parnoki asenok nem parnok bilemtetdaktsüner,” ta Obama-i ashi.
Pai, “Asenoki iba dang nungi tajungba inyaktettsü. Asenok nüngdak dang parnok bushiba ama parnoki nüngdak danga asenok alitsüla,” ta shisem.