Raratsü atema army ajak renema alitsüla: General Bipin Rawat

Bengaluru, November 04 (Agencies): Honibarnü Army tongti, General Bipin Rawat-i, Indian army ajak raratsü atema renema alitsüla, aser ibaji parnok mapa lir, ta ashi.
China Tir, Xi Jinping-i China armed forces dang raratsü atema renema alitsüla, ta jembiba dak sendakba nung osangbenertemi asüngdangba ka langzüdang Rawat-i iba o ya metetdakja liasü.
General Rawat-i, “Raratsü atema army ajak renema alitsüla, ibaji Army mapa lir, anungji iba nungji tasen kecha mali. Ni-a renema alitsüla. Yimjung mapang süaka ajaki training agir aser tarutsü atema renema atar, anungji iba nungji tasen kecha mali,” ta ashi.
Karnataka kübok Belegavi nung jembidang Rawat-i, India aser China naprong sepaitem Doklam nung liasü, saka tejak chitepa majurutep, ta ashi.
India aser China sepaitem India, China aser Bhutan arrtsülen, Doklam nung raratsüsa tensa ka nung anogo 71 tashi aruba sülen August ita nung linük anapronglai iba tesem nungjagi sepaitem agientsü lemteta liasü.
Tanü Cauvery College, Gonikoppal (Kodagu district) nung Rawat-i Field Marshal K M Cariappa aser General K S Thimayya na indang kürakyanglu semzükja liasü.
India nüchiso anguba sülen Cariappa ya mezüngbuba India Army tongti liasü aser Kodagu district nungi Thimayya ya-a Army tongti inyaka liasü.