Ration Card taila crore 1.6 agienba ajanga sen cr 10,000 kümzükogo

New Delhi, June 26 (Agencies): Kümshia subsidy bill nung sen crore 10,000 shi kümzüktsü mechi nung sorkari Ration Card taila 1.6 crore agienogo, ta Finance Secretary, Ashok Lavasa-i Deobarnü metetdaktsü.
Iba dak alia sorkari cooking gas (LPG) subsidy sen indangindanga agütsüba ajanga sorkari sen crore 14,872 kümzükogo, ta pai yangi osangbenertem dang ashi.
Taküm küm tatemlen tashi nung Direct Benefit Transfer (DBT) ya scheme 150 tashi akumtsü, ta paisa metetdaktsü.
DBT-i Aadhaar mesüra unique identification number amshia tajangzük angurtem maitsü jangjar, aser iba kübok tajangzüktemji indangindanga parnok bank account nung inoktsür, aser ibaji ajanga sen tezüleni maor mesüra tim mesüi mamshir.
Iba ya ajanga taila nung tajangzük angurtem agienogo, koba ajanga welfare schemes nung sen jenti kümzüker.
“Iba (DBT amshiba) ajanga sen kümzükbaji scheme shia balala lir. Ibaji ano onoki masadang. Taila ration cards intoktsü atema temaitsü kar lir. Ibayongji ration card crore 1.6 dak tema intokogo,” ta Department of Expenditure tongti, Lavasa-isa ashi.
“Aser iba kija nungi sen crore 10,000 shi kümzükba asadangteter,” ta pai ashi.
Iba den kasa LPG nung DBT code tenüng PAHAL ajanga taila crore 3.5 intoka totzü subsidy nung sen crore 14,982 kümzükogo.
“Iba den kasa 2015-16 küm MNREGA nunga shilem 10 shi savings liasü, aser ibaji taila job cards agienba ajanga lir,” ta paisa metetdaktsü.
DBT ajanga tajangzük angur crore 31 ayimjemogo aser MNREGA den PAHAL ajanga sen crore 1.9 dak tema parnok nem indangindanga bank account ajanga lemtsüogo, ta Lavasa-isa shisem.