Ravi-i Naga nunger mezüngmeshi masütsüla : NPCC

Dimapur, July 16 (TYO) : Naga yimten tebilemtsü latettsü asoshi NSCN-IM telok den India tenüng nung jembir, Wb.R.N.Ravi-i Naga nunger tangatetba mezüngmeshi masütsüla ta Nagaland Pradesh Congress Committee nung tir Wb. K.Therie-i metetdaktsüogo.
Anogo ishika jakdang Wb.R.N.Ravii Nagaland nung osangbener kar den jembidang, taoba 2015 küm August 3 nü India sorkar o NSCN-IM na tsüngda tangatettep ken o yangluba dak aketba onük, tezüluba nung mesayuaka, ajak Naga nunger lenirtem dang senden aika nung kanga junga rasaa shiogo ta metetdaktsüba ken o mangai NPCC tiri iba o ya metetdaktsü.
“R.N.Ravi-i Naga nunger tangatetba mezüngmeshi masütsüla, pai ochishia tezülubaji sayutsüla,” ta K.Therie-isa metetdaktsü.
” Pai onüktemji timtem agia rasaa ashitsü nüngdak madoker, Naga nungertemi azüngtsü aser zülutsü meteta dang lir. Naga nunger 82%-i azüngtsü aser zülutsü meteta lir aser nisung ajak azü nung Naga yimten tebilemtsü ya ia lir. Azüng zülu mashirtemiang Naga nunger taginübaji temetetba aser tangateter Naga nungertemi India temzüng angateta dang lir,” ta paisa ashi.
” Pai ken o lemtettsü makok ta onoki angateta lir, India government-i ojang menutsüla,” ta paisa ashi.