Ravinder Kumar-i ano nisung 15 tepsetba nangzükogo

New Delhi, July 21 (Agencies): Tanur jenti tepseter arishi küm 23 Ravinder Kumar taoba hopta South Delhi nung apuba sülen police-i asüngdangyaba mapang pai tanur 15 tepsetba pai nangzüka liasü, aser maneni pai ano tanur 15 tepsetba nangzükogo.

Yashi pai, par mendemer ana den 2008 aser 2015 küm tsüngda Delhi aser Uttar Pradesh na nung tanur 15 shi tepsetba nangzüka liasü, aser maneni ano tanur 15 tepsetba pai nangzükba ajanga tanur 30 tashi tepsetba osang jangjar.

Police-i asüngdangyaba mapang Kumar-i, pai tanurtemji sen aser nanglong agi mesüzük aser shi nung medemtsü asoshi parnoki memulungra parnok tepseter tasümang denji shi nung medem, ta shiogo.

Iba dang ya shisatsü meshitakba ‘necrophilia’ mesüra tasümang den medemtsü jangraba yimya ta ajar.

Pai ashiba agi, pa kodang yi jemdir pa khenyongi nisung balaka akümer aser par mendener Dharmender o Kishan na den külemi jabujariba video reprangba sülen parnoki tanurtem apu aser tashiyim agi medemba sülen tepset.

Pai mezüng pa arishi küm 17 asüba aayanger ka jala raksatsür tepset aser 2009 küm nunga aayanger ka jabaso ka den shi nung medemba sülen tepset.

Pai aibelen mapatemji pai anepdang züngia mesüra nikongdang inyaka liasü.

Police ketdangser kati, “Pai kiyong sema senzüa kima mesüra metsü meshitak anasa alir tanurtemji nanglong mesüra sen agi mesüzük. Parnoki memelungra tebang nembangtsür apu,” ta ashi.

Ajisüaka tatalokbatemji shinga danga mashitsü ta tanur jagi nangzükra pai metepseti toktsü. Ravinder-i nangzükbatem nung ajemdaker local police-i asür kinüngertemji bushitsü tenzükogo, iba den külemi par medemer anajia bushi tenzükogo.