Rayja Sabha MP, Khekiho alima nungi pilaogo

Dimapur, Nov. 26 (TYO): Brihostibar anepdang 6:20 ako meta Nagaland nungi Rajya Sabha MP, Khekiho Zhimomi New Delhi nung aliba All Indian Institute of Medical Sciences (AIIMS) nung temelungjang tashitak ajanga alima nungi pilaogo.
Arishi küm 69 lenir Khekiho anogo asemnü tejaklen temelungjang tashitak agi shiranga mozükidangi anir oa liasü.
Zhimomi-i pa kinüngtsü den jabaso ana aser jala trok toktsür alima nungi pilaogo.
Tayimtsü ajanga pa mang Brishotibar aonung 9:20 meta Dimapur airport atong.
Pa den asüpila sentong Hokolbar nü, November 27 anüngdang 11:00 ako nung Agri Expo, 4th Mile, Dimapur nung agitsü.
Pa Rajya Sabha züngsem anabenren inyakogo – July 2008 nungi April 2010 tashi aser April 2010 nungi pa tasünü tashi.
Mezüng pa 1989 küm Nagaland Legislative Assembly nung shima liasü aser MLA asembenren inyak-1989 küm nungi 1992 küm tashi, 1993 nungi 1997 tashi aser 2003 nungi 2008 küm tashi inyak.
1990 küm Chief Minister, Vamuzo-i aniba Nagaland People’s Council sorkar mapang nunga pa Cabinet Minister in charge of Industries & Commerce inyaka liasü.