Razak-i Malaysia Ato Kilonser menden toktsütsü memulunger

Kuala Lumpur, August 31 (Agencies): Malaysia nung tentetba tongti telok, Bersih-i aniba nüburtemi pa yimsüsütsü menden toktsütsü takbangba benoka taoba anogo 2 kanga sashia longkak aitaka, Najib Razak-i Malaysia Ato Kilonser menden metoktsütsü lemtetba osang ka tanü Hombar nü metetdaktsüogo.

Malaysia kübok Kuala Lumpur nung tentetba Independence Square nung par linüki 58 buba National Day anogomong tanü amongdang pai iba osangji metetdaktsü.

Razak-i Ato Kilonser menden metoktsütsü lemtetba osang sangoktsüba den külemi, tan longkak aitertemi pei linük memeimba olen ka tanü sangoktsü.

Razak mendenbuba süa sorkari ketdang asüba 1MDB senpong nungi dollar sen million 700 tashi Razak-i ozüng alema agizüka taküm July ita agiba osang angazükba sülen Malaysia nübur 200,000 dak temai taoba Honibar aser Deobar nü na Independence Square nung sentepa Razak yimsüsütsü menden nungi anentsü takhangba benoka kanga sashia longkak aitba osang bushitetogo.

Ajisüaka, pai agizükba senji Middle East-i tenla agütsüba sen ta shia, pa anema okadak benokba ochimashi ken o nung pai aibelena maliba olen ka Razak-i metetdaktsüogo.

Pai aibelena maliba osang metetdaktsüba den külemi, Razak-i pa anema benokba ken o bushisüngdanger attorney general-a mapa nungi anentsüba osang bushitetogo.

Razak Ato Kilonser menden toktsütsü takhangba benoka longkak aitertemji taoba Malaysia Ato Kilonser, arishi küm 90 tain Mahathir Mohamad-i aniba osanga jangjaogo.