R&B kentener Billy Paul süogo

New York, April 25, 2016 : 1972 küm “Me and Mrs. Jones” ken atenba ajanga nüburtem ajaki kanga jangja meteta nüngtugu akümsang, R&B kentener Billy Paul arishi küm 80 nung süogo.

Paul ya New Jersey nung par kidang April 24, 2016 nü kanga shiranga lia asütsü, ta mirror.co.uk. osang ajanga ashi. Pa dak tawa pancreatic cancer keta aliba putet.

Pa indang website sangdong ka nung: “Onoki tanü Billy iba lima nungi pilaba osang kanga sasaseta temulung agi maremi sangdonger,” ta züluja lir.

“Tanü par kibong mangyima temulung zürep tia nung aliba mapang onoki pai anünga yutsüba kinungtsü aser kinunger ajak den asükhu lemsateper. Billy süaka kodanga mamatettsü,” ta sangdong nungsa shia lir.

Pai küm 60 dak tema ken tena aruba mapang 1972 küm “Me and Mrs. Jones” ken ajanga Grammy Award ngua liasü.

Pa dak tashidak agi mekongshi tashi ‘live’ kenten sentong dang agüja liasü. Pa ano kenten sentong aika agitsü anendaka yur iba lima nungi pilaogo ta par manager-i ashi.

Pa soli Paul Williams ta tenüng jatsü ajisüaka ken zülur Paul Williams den maiteptsü atema par manager-i ashiba anga Billy Paul ta melener amshia aru.

Pai mezüng “Ebony Woman” aser “Going East” kenseptem adoka kanga tajangzük keta yoktet.

Paul-i kinungtsü Blanche den tanur ana toktsür iba lima nungi pilaogo.