R&B Minister Vikheho-i Indo-Myanmar Friendship road semdang

Kohima, April 16 (TYO) : India aser Myanmar tsüngda International Trade Road kanga junga yangludar, ta Roads & Bridges Minister, Y Vikheho Swu-i metetdaktsü.
April 14, 2016 nü Minister, Y Vikheho Swu-i Nagaland nung Meluri Sub-Division kübok Avakhung yimtsüng nung yangluba Indo-Myanmar Friendship Road aser Myanmar nung Chera-Layshee semdang.
Iba mapang nung School Education & SCERT Minister, Yitachu, Industries & Commerce Parliamentary Secretary, Amenba Yaden aser Road & Bridges Department Chief Engineer, Tali nungertemi Minister Swu meina liasü.
Avakhung yimtsüng nungi Myanmar den arrtsü tashi kilometer 24 lenmang ka lapokogo aser iba lenmang indang osangji Contractor, Viu Angami-i metetdaktsü.
“North Eastern Council (NEC) kübok Centre sorkari teyari agüja lenmang yangluba nung tenük asünger. Anatsülen tsütsü lenmang sendaktepogo aser Mount Pellang nung dang kilometer 2 shi ka yanglushitsü anüngdaka lir,” ta Vikheho Swu-i ashi.
Meluri Sub-Division nungi Local MLA aser Minister Yitachu-ia ashiba agi, iba friendship road ajanga India o Myanmar sendaktepba sülen shishilembaba aser rongsenkettsüng nung terenlok anguba dang masü saka linük ana tsüngda tesentaktep tashi itshitsü imlar.
“Asenoki textile, medicine, vehicle parts, agricultural machineries aser tanga hardware tem belentsü aser Myanmar nung Saigang tesem nungi jang, ango aser shirurutem belentsü lenmang sadema lir,” ta Yitachu-isa ashi.