RBI-i Nepal Rastra Bank nem senpak 100 kija nung sen bn. 1 agütsütsü

Kathmandu, January 06 (Agencies) : Nepal Rastra Bank (NRB)-i linük nung INR senpak 100 agi kanga anünger anungji iba senpak nüngdaker ta temepishiba ka agütsüba atalokja Reserve Bank of India (RBI)-i sen 100 indang senpak kija nung India sen billion ka agütsütsü mulungogo.
November 08, 2016 nü nungi India nung sen 500 aser 1000 senpaktem nokdangba ajanga NRB-i senpak 100 temji bener arutsü mapang agir, ta Hokolbarnü Himalayan Times osangkaket nung shia lir.
RBI-i tamalena Nepal central bank dang India nung sen nokdangba tensa tera süngjemdakjang ta shiogo.
Tang NRB nung ketdangsertemi, central bank-i iba sen January ita nungsa bener arutsü renemdar, ta metetdaktsüogo.
India nung sen nokdangba inyakyim tenzükba sülen Nepal nung Nepal Rastra Bank nunga India sen melentsü latetja (limit) aliba ajemogo.
Tang-a linük senso tejangja nem anogo nung sen 2,000 tashi melentsü lapokja lir.
Ano India nunger pei linüki aotsüpur nema parnok ket nung train mesüra tayimtsü ticket tejangja aliba kuli jangjar külen sen 10,000 melentsür aser India-i mozü agitsü aoertem nem sen 25,000 melentsür.
NRB nung ketdangser, Janak Bahadur Adhikari-i, RBI-i akhi ama sen magütsüra India sen melenba limit tang amai dang alitsü, ta metetdaktsü.
RBI-i Nepal nem küm shia sen melenba nung amshitsü asoshi sen billion 6 agütsür ajisüaka takümbo India nung senpak tasen adoka sen tejentem nokdangba ajanga iba kasaji magütsütettsü akok, ta Adhikari-i ashi.
“NRB-i takümbo tang tashi nung ano sen billion 1.20 ang bener arua lir,” ta paisa ashi.
NRB ket nung tang India sen billion 3.5 shi lir aser kodang sen billion 1 ji bener arudir Nepal aser India nunger ajak nem ita ti nungi toku tashi sen melentsü maongka agütsütettsü.