RBI-i sen 10 shidi sen menüngogo

Mumbai, Aenjeti (January) 5 (Agencies): Reserve Bank of India (RBI)-i sen 10 shidi sen tasen ka adokogo. Sen tasenba tasazük lendenlenji tang amshiba sen 10 den kasa asütsü saka metonglen tera agi tatsüba asütsü.
Sentsü aser tasazük balala asüba den ano tanga temelenshi kaji sen tasenba nung Konark Sun Temple indang tamaitsü noksa enoka lir.
RBI governor Urjit Patel-i sign asüba senpak 10 tasenbaji kobi melii amshitsü ta RBI-i metetdaktsü.
Ajisüaka, RBI-i menüngba tang tamshidak sen 10 aser ano tesüiba mapang menüngba sen 10 ajak maneni amshitsü ta parnokisa ashi.
Tanga shidi sentem ama sen 10 nunga abelenlen menüngba küm, ‘Swachh Bharat’ noksa den yimyim aser oshi keta lir. RBI-i kobi melii parnok kongsangtem ajanga iba sen amshi tenzüktsü.
Külen, RBI-isa bank tem dang sen 200 shidi sen tasen amshitsü atema ATM tem yanglushitsü atema tetuyuba agütsüogo.
2016 küm demonetization inyakba sülen RBI-i sen telemsa pungu indang senpak tasentem menünga amshir. Demonetization süli sen 2,000 aser 500 shidisen tasen menüng aser iba sülen RBI-i sen 200 aser 50 shidisentem menüngogo.