RCK, KGOF aser CYO nungeri khukhua aitsür

Dimapur, Rongchii/April 05, 2020 (TYO): Dimapur district kübok COVID-19 atema Senior Specialist (Orthopaedic) aser Quarantine Officer, Dr. Nosezol Sezo Hokolbar aonung pa duty temer kidangi shilangba mapang Purana Bazaar nung Special Task Force Police-i pa dak züka merenshiba osang angazüka Rotetso Clan Kidima-i kanga dang jashiba lemsatepogo.
Iba ama nisung mapayuba aser taochi mesayui Dr. Sezo dak teka ayiba ya onoki sashi aitsür aser lokti nung iba amala inyakyim ya khenyongi magizüker. Anungji iba ama tashiyim mapa inyakba nung densema alir police tem mapa nungi tangsa anentsütsü asoshi onoki akanger.
Kasa mapang, DGP Nagaland, T. J. Longkumer, IPS-ia police tenüng nung tatok meshia aruba asoshi pelaba metetdaktsür aser tekaratiba nung bushisüngdanga ochi obendang agütsütsü asoshi mepishiogo, ta Rotetso Clan Kidima President, Neisal Rote-i metetdaktsü.
Kidima Gazetted Officers’ Forum (KGOF)-ia Dr. Nosezol Sezo dak police-i teka yia mejungi konghshiba osang angazüka iba inyakyim khukhua aitsüogo.
Nübur tenzüktsü mechi mapang talila agüja bendanga inyakba doctor ka ta meteta, mask meinokba atema pa dak teka yia aser iba den külemi pa gari raksatsüba angazükdang kanga jashiseta bilemtsür.
Iba ama tensa ka nung health worker ka dak police-i teka yia aser mapa tamjung inyakba ngua KGOF-isa item inyakyim aser jakla khukhua aitsür.
Anungji, aibelenertem pua tekaratiba nung tapet temerenshi agütsütsü asoshi KGOF-i tim ketdangser dang mepishir, ta KGOF President, Dr. Kedise Pucho-i metetdaktsü.
Maneni, Chakhroma Youth Organisation-ia, külem CYO züngsem Dr.Nosezol Sezo dak Hokolbar aonung STF-i teka sangshia pa gari raksatsüba osang angazüka tejashi lemsatepba mapang, police-i iba ama taochi mesayui inyakba maparen ya teloki khukhua aitsüogo.
Duty nung taküm bendanga agüja inyaker medical doctor ka dak iba ama lendong atalokba ya kanga dang tesasatsüka lir. Iba aonung Dr. Sezo dak duty noktaker police-i azükba dang masü, saka pa gari dena raksaja liasü.
CYO-i item aibelener tem tekaratiba nung pua ozüng agi meleba ama tapet temerenshi agütsütsü asoshi Director General of Police dang mepishiba den külemi parnok ya mapa nungi anentsütsü asoshi takangba agütsüogo.
Nübur kümzütsü asoshi shima yutsüba tekolakpur, talisa ozüng nung ajemdaker inyaker police-i iba ama jakla aser yimya sayuba ya Naga nungeri khenyiongi magizüktsü aser aitsütsü asoshi CYO-isa ayongzüker, ta CYO President, Seyieneilhou Keyho-i metetdaktsü.