RCS Udan Scheme kübok Guwahati-Shillong-Dimapur tayimtsü senzütsü

Dimapur, Yimpoksüi/Nov. 19 (TYO): Alliance Air ajanga November 22, 2021 nü nungi tenzüka Guwahati nungi Shillong aser Dimapur tashi arutsü aser ano meyiper aoba tayimtsü ka senzütsü, ta sangdonga liasü.

Iba tayimtsü (Guwahati-Shillong-Dimapur & meyipba) ya Government of India RCS Udan Scheme kübok alitsü.

Airlines ajanga item yimti asem sendakteptsü atema 70 seater luxurious aircraft agütsütsü. Tayimtsü ya hopta nung pezünü (Hombar, Bodhbar, Hokulbar aser Honibar) senzütsü.

Flight 9I 735 ya Guwahati nungi anüngdang 12:20 nung apusotsü aser anüngdang 1:05 ako nung Shillong atongtsü. Iba sülen Flight 9I 735 ya Shillong nungi anüngsang 1:30 ako nung ayamesotsü aser nikongdang 2:20 nung Dimapur tonga arutsü.

Flight 9I 736 ya Dimapur nungi nikongdang 2:50 ako nung ayamesotsü aser nikongdang 3:40 nung Shillong atongtsü.

Flight 9I 736 ya Shillong nungi nikongdang 4:05 ako nung ayamesotsü aser nikongdang 5:10 ako nung Guwahati atongtsü.

Mezüng anogo nung Guwahati-Shillong indang Inaugural fare ya sen 1,786 nungi tenzüka alitsü, Shillong-Dimapur ya sen 1,887 nungi tenzüktsü, Dimapur-Shillong ya sen 2,302 nungi tenzüktsü aser Shillong-Guwahati ya sen 1,786 nungi tenzüktsü.

North East nung item yimtitem tayimtsü agi sendakteptsü ya mapang talangka nungi nüburtemi yongya liasü.

Item yimtitem nung tebour tajung ali telemok, tenem nung tzüpokdak, arem min tulu, süngo lu tulu, rür agi meyibanga aliba tenem, ayong tulu, sobaliba balala aser benjongbentsü agi tourist tem atsür arur.

North East India nung alima tebour tajung aser sobaliba tabu balala agi sünga lir aser item tayimtsü ya ajanga senzüsemponger aser tourist atema lenmang tajungba lapoktsütsü.

Item tayimtsü atema www.airindia.in nungi tali tejangjaba metettsü.