RD department Director den tepila sentong agi

Kohima, September 30 (TYO): September 30 nü taoba Rural Development department Director Imlimeren Jamir nem tetushi agüja tepila sentong ka ayonga agiogo.
Imlimeren Jamir-i 1984 küm Research Officer ka ama sorkar mapa inyaktsü tenzük aser küm 35 tashi inyaka aruba sülen sodi angur.
Küm ka ser ita 9 tashi RD Director inyakdang teyariteper ajak dang kanga pelar. Mapa inyaka arudang aika ajangshiogo aser angazükogo aser iba atema Tsüngrem dang pelar, ta Imlimeren-i o jembidang ashi.
Sentong nung RD Minister, Metsubo Jamir-i o jembidang ‘Imlimeren ya kanga dang ajemalu aser tashi angaba ketdangsertem rongnung ka lir’ ta ashi.
Pa den külemi inyaksemtsü maongka anguba atema kanga pelar aser pai department takok ngua ketdangsüba atema tenüngsang agütsür, ta Metsubo-isa shisem.
Paisa department nung ketdangsertem staff dang department tiptema aotsü atema Director tasen den yariteptsü ayongzük.
RD principal secretary, Bendangkokba, IAS-ia Imlimeren Jamir ya ketdangser aser meimchir tajung ka ta ashi.
Pa ya Department nung kanga dang teyakyak ketdangser ka liasü aser pa sodi anguba atema sasar. Pai director inyakdang tetsükdaktsü aika ajangtetba atema tenüngsang agütsür aser director menden akhümketa ayuba atema pelar, Bendangkokba-isa ashi.
Sentong nung Addl. Director, RD, Imnukshila Jamir, Addl. Secretary, RD and MD (NSRLM), Athel O Lotha, PD, Phek, DRDAs tenüng nung Azenuo Pienyu, BDO’s tenüng nung K. Yamao Konyak, ministerial staff tenüng nung Superintendent, RD, Yapanla Jamir, aser secretary, NRDSA, N. Kupto Achumi nungertem o jembi.
Iba sentong nung mendenji joint director, K. Neibou Sekhose liasü aser Addl. Director, Thungjamo Odyuo-i anküp tepela o jembi.