Real Madrid coach Zidane-i mapa toktsür

Madrid, Monupii 31 (Agencies): Zinedine Zidane lenisüba kübok Real Madrid-i Champions League asembenbuba atonga takok ngur anogo pongu sülen pai iba menden toktsür, ta sangdongogo.
Zidane-i osangbener senden ka nung jembiba mapang, “ajak melenshir aser iba ajanga ni iba telemtetba agi,” ta ashi.
Aenjeti/January 2016 nung pai iba mapa agizükba sülen Spain nung aliba Real Madrid club-i Champions League asembenbuba atonga akok aser La Liga khen akok.
Ni iba club meimer. Ni bilemba agi, iba team-i maneni akoktsü nüngdaker saka temelenshi ka nüngdaker amai bilemer, ola balaka, yimya balaka. Ni asoshi, asayartem atema aser club asoshi tang ya mapang tetemsü lir,” ta taoba mapang France nungi football asayar tejen, Zidane-i ashi.
Rafael Benitez melena arishi küm 45 tain, Zidane ya shimtet aser pa lenisüba kübok Real Madrid-i game 149 tashi asaya. Iba mapang Real Madrid-i asaya 104 akok aser 29 draw süa takokba shilem 69.8 liasü aser takok marok teku tashi ngutet.
Saka 2017-18 La Liga nungbo Real Madrid ya jenjang asembuba nung season tembang. 2017-18 La Liga takok marok Barcelona-i aben aser iba season nung Real Madrid ya points 17 agi Barcelona dang tajemba liasü. Maneni Copa del Rey quarter final nung Real Madrid ya Leganes teloki tsükdaktsü.
Zidane-i par club nungi pilatsü indang ya Tsüklai/February nunga shia liasü.
Saka Champions League final nung Real-i 3-1 agi Liverpool koker mapang talangka melie iba osang sangoktsüba ajanga nisung aika aoksateper.
Taküm Champions League final nung takok anguba ajanga Bob Paisley (Liverpool nung asemben) aser Carlo Ancelotti (AC Milan nung anaben, Real Madrid nung khen) na den kasa Champions League/Europe Cup takok marok asemben abener kümogo.
“Ni ajak asoshi iba ya inyaker,” ta Zidane-isa Yangtepnü ashi.
Real pur ya küm pongu nung manager pezübuba bushir.
Taoba mapang nungbo Tottenham coach, Mauricio Pochettino ya Real telok den sendaktepa liasü, saka Argentina nungba ya taoba hopta ang Spurs den küm pongu atema contract zülutepogo.
Zidane melentsü asoshi Juventus manager Massimiliano Allegri, aser küm 22 tashi Arsenal anir arusang, Arsene Wenger nungera shimtsü akok.
Maneni tesüsa Napoli club nung manager inyaksang, Italy nunger Maurizio Sarri-a azünga lir.
Real Madrid ketdangsütsü asoshi telemtetba ya iba club tir, Florentino Perez-i agitsü.
Osangbener den senden amenba mapang France 1998 World Cup akoksang, Zidane den Perez-a aru aser pai Zidane ya par club manager nungi manendaktsünür ta ashi.
Gareth Bale aser Cristiano Ronaldo nati tarutsü nung iba club indang bilemdanger ta sangdongba sülen Zidane-i iba club toktsür.
Liverpool den Champions League final asayaba mapang Wales nunger forward nung asayar, Bale ya substitute nung yutsüba ajanga mepela aser Ronaldo-ia pa indang tarutsü sentong kobi melie sangdongtsü ta taoba hopta shia lir.