Real Madrid-i Barcelona koka Clasico benogo

Madrid, Metsüremi/March 2 (Agencies): Deobarnü Clasico final asaya nung Real Madrid goal 2-0 agi Barcelona kokogo aser parnok La Liga nung temaba jenjangi tuogo.
Santiago Bernabeu nung asaya nung Vinicius Junior-i goal ka aser mapang apuloktsür asayaba mapang Mariano Diaz-i goal ka ta idakja Madrid puri asaya koka liasü.
“Hopta tatemi maongka aliba indang onoki jembia liasü aser onoki iba maongka agiogo,” ta Real Madrid manager Zinedine Zidane-i ashi.
Iba takok sülen parnok point ka agi Barcelona dang nungi timba küma temaba jenjang nung lir.
“Onoki onok dak temulung lema masayatet. Asaya nung onok tashi maitba mapang ka liasü aser iba mapang nung goal ai,” ta Setien-i ashi.
Zidane-i Honibarnü, iba asaya ajanga May ita shibai takok marok ajungkettsü aji jangjatsü ta shiogo, saka Barca-i asaya koka point pongu tebendang kümra meneptsü tasak süla.
Asaya nung Barca puri akoktsü merangtsü melena asaya tembangdaktsütsü asoshi asaya, koba attack süa asaya nung tajungba sür lila.
Barcelona puri asaya kanga meyilongi tenzük ajisüaka parnoki goal idaktsütsü asoshi maongka ngutetogo. Alba-i agütsüba ball ka Antoine Griezmann-i cross bar adena metsüdok aser iba sülen Courtois-i ball ana kanga junga nokdanga liasü.
Mezüngbuba nung Arthur-i metsüba ball ka Courtois-i tetsüng agi nokdang aser iba sülen Messi-i Madrid indang defence tesülen nungi metsüba ball ka pai kanga junga nokdang.
Ramos-i aibelenba ajanga Nelson Semedo-i pa adena ball bener alu saka goal magütsütet aser kasa mapang nung Valverde alangdaktsüba sülen Alba tera agi dang tanabuba yellow card machi.
Asaya tanabuba shilem nung Barcelona puri aibelen kanga mena aser Madrid-i goal idaktsütetter lila. Isco-i tongloktsüba ball ka Marc-Andre ter Stegen adena ao saka Pique majangtet aser Karim Benzema-ia maongka tajung ka anguba goal post adena ball metsüdok.
Telok ana tsüngda kanga toktepa asayaba sülen minute 71buba nung Vinicius-i metsüba ball ka Pique dak tsükdaker ai.
Goal idaktsüba sülen Barcelona puri goal idaktsütsü asoshi meranga asaya saka Messi-i ball bener lua aliba Raphael Varane-i kanga junga nokdang aser Pique-i tongloktsüba ball ka post adena ao. Casemiro alangdaktsüba atema Messi nema yellow card ka agüja liasü.
Atakzükja aliba asaya mapang tembangba sülen Mariano-i tanabuba goal idakja parnoki asaya akok.