Real Madrid-i Champions League kokogo

Cardiff, June 4 (Agencies): Honibarnü Cardiff nung Champions League final asaya nung Real Madrid-i 4-1 agi Juventus madak takok nguogo. Iba asaya nung Cristiano Ronaldo-i goal ana tashi agüja liasü.
Asaya tenzüker mezüngbuba goal Ronaldo-i agütsü saka mapang tatsüka tsüngda nung Mario Mandzukic goal kanga dang tajung ka agüja küpzük. Iba sülen asaya tanabuba shilem nung Casemiro, Ronaldo aser Marco Asensio nungeri goal kaka agüja Madrid puri takok angu. Iba takok ya parnok asoshi küm 4buba nung tasembenbuba takok lir aser ajak senteper 12 buba takok lir.
Ronaldo Champions League takoker rongnung tang agi bezübenbuba adener aser taküm züngsema küm 5 tashi iba asayamong nung goal timtiba agütsür rongnung mezüngbuba jenjang ajangtetogo. Iba takok ajanga ano maneni pa Ballons d’Or 5 ben buba angutsü asoshi maongka lapoktsür, koba tang tashi nung Lionel Messi-i ajangteta lir.
Zinedine Zidane Real Madrid coach mapa agizüker tang agi ita 17 buba dang lir saka pai aniba teloki European Cup anaben tashi atonga kokogo. Tang tashi nung Arrigo Sacchi-i aniba AC Milan team-i dang European championship anaben tashi atonga koka lir. Parnoki 1989 aser 1990 küm koka liasü.
Iba season nung Madrid-i La Liga aser European Cup na prongla kokogo aser iba takok ya 1958 küm sülenbo taküm mezüngbuba lir. Parnoki ano Club World Cup aser European Super Cup dena koka lir.