Real Madrid-i Champions League marok benogo

Milan, May 29 (Agencies) : Honibarnü Champions league final asaya nung Real Madrid aser Atletico Madrid na tsüngda 1-1 agi draw asüba sülen penalty metsütepdang Real Madrid-i 5-3 agi akok.
Asaya tenzüker minute 15buba nung Sergio Ramos-i Real Madrid atema goal ka yok. Iba sülen tanabuba asaya tesadang tenzükli Atletico nungi Antoine Griezmann-i penalty ka metsüba goal post nunga metsüloktsü.
Atletico-i tesüiba final asaya ana nung Real Madrid makok lir aser tan-a parnoki goal aika yoktsü maongka ngur meyoktet. Ajisüaka nisung ka melena aitsang Yannick Carrasco-i minute 79buba nung Real-i yoka aliba goal aotoka parnok mapang talila asayatsüsa aküm.
Penalty metsütepba mapang telok anaprongla nungi atonga atonga goal tenet yokba sülen Atletico atema penalty pezübuba metsüsang Juanfran-i goal post nungang metsüloktsü. Anungji iba sülen Ronaldo-i ayong ayonga goal ka metsüokja iba takok marok Real Madrid-i aben.
“Penalty ji teti lottery asayar amai lir. Aji oda süaka ozü teloki penalty pongu prong goal yokba ajanga onok dak sempet tajung aliba sayuogo,” ta Ronaldo-i ashi.
Atletico-i asaya tenzükli tesem tamajungdak free kick ana mena. Casemiro-i metsüba mezüng free kick goalkeeper, Jan Oblak-i kanga junga nokdangtet, ajisüaka tanabuba Toni Kroos-i metsüba free kick bo Ramos-i tanemi goal telongi metsüoktsü.
Tanabuba asaya tesadang tenzükli Pepe-i Fernando Torres indang tetsüng mejepa ayuba ajanga Atletico pur penalty ka angu, ajisüaka goal meyoktet.
“Onoki onok dak aliba tajungtiba sayuogo. Takok anguba jangratem ya khenyongi balaka lir,” ta Bale-i ashi.
“Asayartemi kanga meranga asayaba ajanga iba takok angu. Final asaya nung takok angutsü nüngdak,” ta Welshman-i ashi.