Real Madrid-i Super Cup kokogo

Real Madrid asayartem Spanish Super Cup akokba sülen pelatepba noksa nung angur.

Aenjeti/January 13, 2020 (Agencies): Saudi Arabia nung Spanish Super Cup final asaya Real Madrid puri penalty ajanga goal 4-1 agi Atletico Madrid madak takok nguogo. Deobarnü final asaya nung telok kati danga goal magütsüteti asaya tembangba sülen penalty metsütepa liasü.
Penalty metsütepba mapang Dani Carvajal, Rodrygo Goes aser Luka Modric nungeri goal idaktsüba sülen captain Sergio Ramos-i penalty pezübuba idakja Real puri iba season mezüngbuba takok marok benogo
Kasa mapang nung Atletico asoshi Saul Niguez-i metsüba ball post nung ondak aser Thomas Partey-i metsüba ball Thibaut Courtois-i kanga junga tsüngtok. Parnok rongnungi Kieran Trippier-i dang goal idakja liasü.
Asaya nung minute 115 orr aliba mapang Alvaro Morata alangdaktsüba atema Real midfielder Federico Valverde nem red card agütsür asaya nungi tugudaktsü, ajisüaka Zinedine Zidane-i aniba teloki asayar ajemaka tatem tashi kanga meranga nokdanga penalty metsüteptsüsa aküm.
Real puri tang agi Super Cup 11 benbuba kokogo aser coach Zidane kübok trophy 10buba koktetogo.
Kasa mapang nung Zidane lenisüba kübok Real pur tang tashi nung final ka nung danga tamakok ngua mali.
Asaya mapang tatemi Morata-i metsüba ball ka Courtois-i kanga junga nokdang aser yamaji Oblak-ia Luka Modric o Mariano Diaz-i metsüba ball kanga junga nokdanga liasü. Super Cup ya taoba küm tashi league aser Cup takoker na asayaa liasü saka taküm nungi team pezü kümdaktsüogo aser Saudi Arabia nung küm asem asayatsü asoshi tenangzüktepba agi. Osang ajanga ashiba agi, euro million 120 agi iba tenangzüktepba agia liasü.