Real Madrid, Juvi, United aser Lyon-i pei tata asaya kokogo

Rongjui/September 20, 2018 (Agencies): Cristiano Ronaldo aser Zinedine Zidane nati toktsür oaka Gareth Bale-i anir Real Madrid puri Rasemnü Champions league asaya nung Roma madak goal 3-0 agi takok nguogo.
Julen Lopetegui-i taoba season final nung Liverpool den asayaba team nungi asaya 10 Roma den asaya nung asayadaktsü.
Asaya nung mezüngbuba goal Isco-i free-kick ka ajanga minute 45buba nung idaktsü iba sülen asaya tanabuba shilem nung Bale-i minute 58buba nung tanabuba goal aser mapang apuloktsür asayaba mapang Mariano Diaz-i Real pur atema tasembuba goal idakja parnoki asaya kokogo.
Real puri Tawa alizükba Thibaut Courtois masü saka Keylor Navas goalkeeper mendaktsütsü asoshi shim aser Roma coach Eusebio Di Francesco-i arishi küm 19 tain midfielder Nicolo Zaniolo senior team nung mezüngbuba anioka asayadaktsü.
Kasa asayamung Group H mezüngbuba asaya nung Manchester United-i 3-0 agi debutants Young Boys Bern madak takok nguogo. Young Boys pur taküm mezüngbuba Champions League nung shilem agir.
Captain Paul Pogba-i tejakdangsür par telok ania parnoki kanga junga asayaogo. Asaya nung Unitet pur atema mezüngbuba goal Pogba-i minute 35buba nung idaktsü aser iba sülen paisa minute 44buba nung penalty ka ajanga tanabuba goal idaktsü. Luke Shaw-i ball cross asüba Kevin Mbabu teka nung kongsiba sülen German referee Deniz Aytekin-i Unitet pur nem penalty metsütsü asoshi maongka agütsü.
Asaya nung telok anapronglai goal idaktsütsü asoshi meranga asayaa arur minute 66buba nung Anthony Martial-i goal tasembuba idakja parnoki asaya kokogo.
Maneni Group F asaya tanga ka nung Pep Guardiola-i aniba Manchester City pur Lyon-i aoksadakja Champions League asaya tamakok nung tenzükogo. Iba asaya Lyon-i 2-1 agi akok.
Asaya mezüngbuba shilem nung Lyon pur atema Maxwel Cornet aser Nabil Fekir nati minute 26 aser 43buba nung goal kaka idakja liasü aser iba ajanga City pur nem iba senson nung mezüngbuba tamakok agütsüogo.
Iba sülen City pur atema Bernardo Silva-i minute 67buba nung goal ka agütsü saka parnoki tanabuba goal magütsüteti asaya 2-1 nung tembang.
Cristiano Ronaldo aruba sülen Juventus puri Champions League koktettsü ta tamangkaa liasü saka Valencia den Rasemnü Group H asaya nung pa nem red card agüja tugudaktsüba sülena parnoki 2-0 agi asaya kokogo.
Asaya tenzüker minute 29buba nung Valencia defender Jeison Murillo dak metsüba atema Ronaldo nem red card agütsü, ajisüaka Juve pur iba ajanga mekongshidaktsüi asaya aser Miralem Pjanic-i goal ana tashi idakja parnoki asaya kokogo.
Asaya nung Valencia pur nem penalty metsütsü asoshia maongka agüja liasü saka parnoki iba maongka magitet.
Ronaldo-i aibelenba ya UEFA-i asadangtsü saka pa Mongputen/Oct 2 nü Young Boys den home nung asayatsü aliba asaya nung shilem magitettsü. Iba sülen parnok Manchester United den asayatsü anunga lir.