Reality TV sentong nung joko shilem magitsü: Hilton

London, November 24 (Agencies): Alima tongti yimti balala nung nüngtugu Hilton hotel tentetsang, America nunger Conrad Hilton’er semchir, Paris Hilton-i joko reality television sentongtem nung shilem agitsü mejangrai akümba olen ka metetdaktsüogo.

Paris Whitney Hilton ya televison nung tongti shilem agir, model, actress, kentener, DJ, shishilembar aser kaketzülur nüngtugu nisung lir.

Taoba mapang ‘Simple Life’ film nung tongti shilem agila, arishi küm 34 tain Hilton-i television aser film nunger nung masü saka shishilembatsüren nung tongti shilem agitsü temulungtetba aliba den külemi, DJ ka ama alima tesem balala semdanga senzütsü tejangraba aliba olen ka Telegraph online-i metetdaktsü.

“Telok aikati reality television sentong balala nung shilem agitsü asüngdang saka ni parnoki benokba onük magizüki aruogo. Ni joko television aser film-tem nung shilem agitsü melena shishilembatsüren nung ang tongti shilem agitsü temulungtetba yua lir,” ta Hilton-ia metetdaktsü.