Red Cross ajanga Bangassou nung tasümang 115 ngutet

Bangui, May 17 (Agencies): Telungpur temi amakba sülen Central African Republic (CAR) arrtsülen aliba jila, Bangassou nung Red Cross telok nung mapa inyakertemi tasümang 115 ngutet aser iba asüba ya taoba mapang asüba osang dang nungi pezüben agi timba kümogo, ta Red Cross ajanga Bodhbarnü ashi.
Tasümang ajunga ya yimya balala nung sür lia angu, karbo kotari agi aser kar bo injang agi yiruba zübu keter liasü, ta Red Cross indang local branch tir, Antoine Mbao Bogo-i osangbener dang ashi.
“Onoki temang 115 angu aser 34 bo remogo,” ta Antoine-i CAR yimtiba, Bangui nungi osangbener den jembidang ashi.
UN nung ketdangser kati civilian 26 asüba osang ka agüja lir.
Bangassou nung tensa majungba ajanga refugee 2,750 bo hopta tsüngta nung arrtsü alema Democratic Republic of Congo-i jena ogo, ta UN refugee agency ajanga ashir.
2013 küm Muslim Seleka rarartemi iba linük nung tir Francisco Bozize ket nungi tashi rakzüka mitkartem ama tesayuba balala angazüker alir Christian anti-Balaka pur tem tepsetba timba kümogo.
Iba tesem nung tesüsa azüdokshiba indang tebilemtsü ya kanga tulu kümogo, ta UN High Commissioner for Human Rights ajanga Mongulbarnü metetdaktsü.
Tejangja masüba osang ka ajanga sayuba agi, May 7 nungi 9 tashi anti-Balaka tenüng nung rarar aser ex-Seleka telok tsüngta Alindao jila nung raraba mapang nisung 100 jungnüa asüba sayur, ta UN Secretary-General, Antonio Guterres indang odongtar, Stephane Dujarric-i Mongulbarnü osangbener dang ashi.