Red Ribbon Club-i Peer Educators atema sentong agi

NSACS-i ayongzüka Red Ribbon Club (RRC) peer educators-tem atema ‘One Day Training cum Orientation’ sentong ka Hotel Metsüben Mokokchung nung takok ngua kar külen shilem agirtem den shisalen sayurtem külemi tangokba noksa nung angur. Mokokchung, September 19, 2018.

Mokokchung Sept 19 (TYO): Department of Health & Family Welfare kübok NSACS-i ayongzüka Red Ribbon Club (RRC) Peer Educators-tem atema ‘One Day Training cum Orientation’ sentong ka yangi Hotel Metsüben Conference Hall nung takok ngua kaogo. Iba sentong nung district pezü; Mokokchung, Wokha, Tuensang aser Longleng kübok college 14 nungi RRC peer educator-tem arua aden.
Iba sentong nung shisalen sayurtemji; IMDH (ART) Medical Officer Dr. Temsumenla Longkumer, A.D (MM) IEC Chongkai Khaming aser A.D. (SPM) Ainato Yeptho par asem liasü. Parnoki shilem balala lemsar HIV/AIDS onük dak sentakba nung RRC Peer Educators-temi inyaka aotsüba aser meteta alitsü atema tagitsü onük aika bener arua lemsatep.
Dr. Temsumenlai onük ka jembidang, HIV/AIDS indang teratet agütsüba den iba ya tanüptsü anguba tashitak ka masü saka mozü shitak chia anepalura tangar ama anema aliba den arishia atsülanga litettsü akoker, ta ashi.
Iba onük dak sentakba nung sorkar aser telok balalai shisatokden sentong tapu balala ayongzüka akar, saka temelenshiba kangabo mangur, anungji, shisatokden nung angazükbatemji pei kisüng angazüker odang meyui memetetertem dang kanga junga ashitsübaji asenok khuret asütsüla, ta tayongzükba ka agütsü.
Iba tashitak puteter rongnung tapayutsü kinü tanur aser lanur tajung aika lir aser aika süogo, anungji, iba tashitak ayim sünga moudaktsüi tarutsü lanu putu kümzüka ayutsü atema teinyaktsü ajak agi kümdangshitsüba dang lir aser iba atemaji pei adianu, kinunger, medemer aser nübur ajak dang tekümdangtsü osang perokshitsüla, ta laisa shisem.