Refuge tebilemtsü atema alimai talangka züba-a liogo: UN

United Nations, September 27 (Agencies): United Nations refugees atema High Commissioner, Antonio Guterres-i, Syria aser alima tesem babala nung rara ajanga prokshia alir refugees tebilemtsü atema alimai tanglaka züba-zülema liogo, ajisüaka tangbo takar linüktemi iba tebilemtsü angateta arur ama reprangteter, ta ashi.
U.N. General Assembly aliba mapang jurila interview ka nung Antonio-i, “Tia makatsü kaji, sensakertem takar limai aruba mapang nunga sensakertema lir ta takartemi angateter asü (?),” ta ashi.
“Europe nung iba mapatong (refugee tem yaritsü linümktem melungtetba) metenzük tashi nungbo iba tebilemtsü ya koda tongtibang’ar terenlok aliba linüktemi memeteti liasü,” ta Comissioner-i ashi.
Ajungbena Syria, Iraq, Afghanistan aser danga linüktem nungi refugee temi Turkey, Jordan mesüra Lebanon nung aliba refugee tem semtu toktsür Europe-i aruba sülen European Union linüktem tsüngda refugee tem anioktsü atema lemsatepdar.
Germany ama linüki refugee tem kanga melungsoa agizüker ajisüaka European anüdoklen aliba linüktemi refugee tem lemsar anioktsü sentong magizüker.
Antonio-isa, “Refugee tem taküm tia tamajungba akumer. Parnok mapa inyaktsü memelar aser parnok timbaka kanga sensak tia nung lir. Tarutsü atema parnok teimla maliba akumer,” ta ashi.
U.N. Secretary-General Ban Ki-moon-i Bodhbar nü refugee dak sentakba nung high level senden ka ayonga amentsü.
Antonio-isa, tangbo takar linüktem mejanga aliba nunga saaker ama reprangteter, ta ashi.
“Yimtenren lenirtemi iba tebilemtsü angateta meimchir dang temeim mapa benshitsü tenzüker ama ni reprangteter,” ta paisa shisem.