Refugee million 4 dak temai Syria toktsüogo: UN

Syria nung tentetba Kurd sepai aser Islamic State (IS) ta ajaba kiralongrar telok na tsüngda kanga sashia raraba tongpang nungi taküm kümzüktsü nükjidong nung Syria toktsütsü lemtetba refugee-temi Turkey arrtsülen, Akcakale nung sentepa aliba noksa nung angur. (Akcakale, July 09)

 Geneva, July 09 (Agencies): Syria nung tongpang kanga sashia raraba ajanga idakji melitettsüsa akümba Syria nung alir nübur million 4 dak temai Syria toktsür kidangsüa aliba linüktem nung refugee ama jenoka aliba osang bushitetogo ta United Nations (UN)-i tanü Brehostibar nü metetdaktsüogo.

Syria Tir, Bashar al-Assad-i aniba sorkar aser sorkar amener na tsüngda adokba mangatettep ken o benteta par linük nung tensaji tajungba akümtsüsa tanü tashi mangdang mongutetba yong taküm 2016 küm tembangba mapang tashi nungbo Syria toktsür kidangsüa aliba linüktem nung jenoker refugee-temji nisung million 4.25 dak tema akümtsü akok ta UN kübok tentetba United Nations High Commissioner for Refugees (UNHCR)-i metetdaktsü.

Syria toktsür nisung million 3 shi akümba osang bushiteter ita 10 tsüngda nung par linük toktsürtemji nisung million 4 dak tema akümer lir ta par teloki ashi.

Taoba June ita nunga Syria nung alir nisung 24,000 dak temai kidangsüa aliba Turkey linük nung jenoka alima ajunga nung refugee-tem timtiba jenokdaktsüba linük Turkey kümdaktsüba osanga bushitetogo ta par teloki shisem.

Syria toktsür refugee nisung noklang shilem nung shilem 45 shi tang Turkey nung jenoka aliba osang bushitetogo.

Tanüngba shilem 55-ji Jordan, Lebanon, Iraq aser Egypt nunger nung jenoka lir.

Syria den kidangsüa aliba linüktemi ketdang mesütettsüsa refugee-tem tali jenoktsü tenzükba ajanga refugee-tem indang taküm tia kanga mejungi aliba den külemi, parnok jenokdaktsüba linüktem indang rongsenren jenjanga mejungi akümtsü tenzükba osang bushiteta lir ta UNHCR otongdar, Adrian Edwards-i metetdaktsü.

“Jordan nung jenoka alir refugee-tem noklang shilem nung shilem 86 shi tanü chiyongtsüa mongu lir. Lebanon nung jenokba refugee-tem indang taküm jenjanga Jordan nung jenoka alirtem den tera agi dang tajungba lir,” ta pai ashi.

Paisa ashiba agi, tarutsü mapang nung Syria linüki tanaben shilangtsü nükla mongutetba yong Syria nunger refugee aikati Europe bushia aotsü tenzükba osanga bushiteta lir.