Refugee nisungtem atema teyari sen billion 2.8 agütsütsü: Abe

Tokyo, September 20 (Agencies): Alimai tang ajurushia aliba refugee aser migrant nisungtem den sentakba khuret den yariteptsü nükjidong nung Japan linüki taruba küm 3 tsüngda nung teyari sen, dollar sen billion 2.8 tashi agütsütsü tenangzükba olen ka Japan Ato Kilonser, Shinzo Abe-i yashi, Hombar nü metetdaktsüogo.
New York yimti nung amenba United Nations (UN) refugee senden nung Abe-i iba tenangzükba olenji metetdakja liasü.
“Refugee nisungtem nem nungdakba teyari agütsüdaktsütsü nükjidong nung parnok jenoka lidaktsüba linük sorkar nem teyari senji agütsütsü nangzüker,” ta Abe-i ashi.
Yaküm, 2015 küm amenba UN General Assembly senden nunga Japan-i pei talidak toktsütsüsa akümer Syria aser Iraq nüburtem yaritsü aser Middle East o Africa na nung yimji yimjung lidaktsütsü mapatong den yariteptsü nükjidong nung dollar sen billion 1.6 tashi agüja yaritsü nangzüka liasü.