Refugee nisungtemi Germany nem timtem bener marutsür: Merkel

Berlin, September 03 (Agencies): Germany linük nung refugee nisungtem jenoka lidaktsüba ajanga par Germany linüki timtem balaka majuruba olen ka Germany Chancellor, Angela Merkel-i tanü, Honibar nü sangoktsüogo.
“Germany sorkari Germany sensotem taküm jenjang tajungba kümdaktsütsü atema rongsen indokba dang nungibo Germany nung jenoka alir refugee nisungtem atema rongsen timba lalur,” ta shia, par linük refugee nisungtem jenokdaktsüba mapatong anemertemi Merkel aser lai aniba Germany sorkar aija lir aser iba aitsüba olen nem telangzüba agüja, Merkel-i tanü iba olenji sangoktsü.
“Refugee nisungtem yariba ajanga Germany sensotem atema renemtsüba tajangzük kecha agiena mali. Taoba mapang ama, asen nübur  taküm jenjang junga aliba kuli tejangja lir,” ta par linük refugee nisung meyirijang jenti jenoka lidaktsütsü telemtetba küm 1 tejaklen agiba atema metentsüba olen ka Merkel-i metetdaktsü.
Merkel-i refugee nisungtem par Germany linük nung jenoka lidaktsütsü lemtetba sülen lar nüburtemi la pusema nungitbaren tang kanga ajema akümba osang bushiteta lir.