Refugee tem Mizoram nungi pei kidangi meyiba ogo

Guwahati, May 26 (Agencies): Myanmar nung aliba Arakan Army (AA) temi taochi melie reshikangshia merenshiba ajanga Myanmar nung aliba Ralei yimtsüng nungi tetsür aser tanur timba nisung 338 tashi arrtsü alema arua jenoka aliba tanaben par limai Bodhbarnü meyiba ogo.
Taoba Hokulbarnü item yimdaklirtem ya international arrtsü ya alema south Mizoram tsütsü Saiha district kübok Lungpuk aser Khaikhy yimtsüng nung aliba kaket reju aser community hall nung arua jenoka liasü. Arrtsülen aliba Assam Rifles (AR) aser Saiha district ketdangsertemi item nisungtem nem nüngdakba lenmang sayua teyari agütsü aser iba yim ana nung aliba nüburtemi chiyongtsü aser tanendak agüja liasü.
“Item nisungtem ya Mizoram nung mapang talangka jenoka alitsüsa mapang aru saka AR aser Saiha district ketdangsertem amalitep teyari ajanga iba tensa agienogo. AR den district ketdangser, police aser Lungpuk nungi yimden yimsüsürtemi lenmang sayua parnok ya lendong timtem kicha melie kidangi meyiba yoktetogo,” ta Defence PRO, Lt Col Suneet Newton-i ashi.
Item refugee tanaben par limai meyiba yokba sentong ya India aser Myanmar indang international boundary pillar No 15 nung Bodhbarnü agi. Ralei yimtsüng nungi yimden yimsüsürtemi anir lenirtem arua par nisungtem tanaben kidangi anir ogo. AA telungpurtem ya Ralei yimtsüng aser temeket tesemtem nungi memetetba tesem-i ogo aser yimdaklirtem ya tanaben kidangi meyiba aotsü junga lir, ta item refugee anir arurtemi osang agütsü.