Refugee temi meyipa moner

Aizawl, Aenjeti 10 (Agencies): Myanmar nung taoba küm Yimpoksüi (November) nung telungpur aser Army na tsüngda rara adokba sülen Myanmar nunger refugee parnok 1,440 shi Mizoram nung arua jenoka lir, aser tang parnoki meyipa aotsüba atema memulunger, ta ketdangsertemi Sangtennü metetdaktsü.
Chin state nung aliba yimtsüng balala nungi Myanmar nunger parnok 1600 shi taoba küm Yimpoksüi 25 nungi tangtashi Mizoram kübok Lawngtlai district nung jenoka lir.
Assam Rifles sangdong ka ajanga ashiba agi, Myanmar Army ketdangsertemi parnok dang Chin state nung Arakan Army (AA) teseptem makdoka iba tesem parnoki azüoka lir, ta ashiba sülen AR puri item refugee tem meyipa yoktsü asoshi merangogo.
“Refugee tem karbo meyipa ogo, saka tetsür 773 aser tanur 442 densema parnok 1440-i kidangi meyipa aotsü asoshi memulunger,” ta osang ka ajanga metetdaktsü. Parnok rongnung kari sorkar o telungpur tsüngda maneni rara adoktsü tsübuba ajanga meyipa moner, aser tanungba temi Mizoram nung dang liner.
Ketdangsertemi ashiba agi, refugee temi ki dena asütsü asoshi merangdang, saka district administration ajanga parnok nokdanga relief camp-i meyipa yok.