Regeni tepsetba dak sendakba nung Italy-i Egyptian ambassador jaok

Rome, Luchii/December 1 (Agencies): Giulio Regeni tepsetba ken o takaraba nung bentettsü asoshi Italy foreign minister-i Rogonü Egypt indang ambassador jaokogo aser Cario dang iba jenjang agiba ya akhümtsübutsü asoshi mepeshia liasü
Arishi küm 28 tain PhD kaketshir ya Cario nung 2016 Aenjeti/Jan nung tepset. Pa tasümang nung reshia kangshia südaktsüba tarak liasü aser pa samaba sülen anogo 10 lir military blanket kati aleper Cairo aser Alexandria tsüngda lenmang tezülen ngutet.
Egypt aser Italy nunger prosecutors tem ita aika sendaktepa inyaka aruaka tang tashi nung nisung shinga pua mali.
“Italy-i iba ken o bushisüngdangba terenlok tejangja ka aginüba Minister [Enzo] Moavero-i lemsatepogo,” ta Italian foreign ministry-i sangdong ka ajanga metetdaktsü. Parnokisa iba ken o asadangba nung Rome temulung masür, ta ashi.
Kasa sangdong ajanga ashiba agi, Egyptian ambassador-i Moavero dang Cairo-i iba ken o nung densema alirtem aputsü asoshi bendanga agüja inyakdar aser iba indang temulung melemi bilemtsü kecha nüngdak madoker. Paisa, Egypt nung ken o bushisüngdangertemi tetsükdaktsü adokaka maneni inyakyonga aotsü mulungteter inyakdar, ta ashi.
Egypt aser Italy nungi prosecutor tem iba hopta tetenzüklen ken o bushisüngdangba indang sensaksemtsü asoshi ajurutepa liasü, saka Rome nungi judicial source tem ajanga ashiba agi, Cairo nungi ketdangsertemi parnok inyakyim temulung süa mesayutet.
Ken o asadangba tejakleni maoba ajanga tezüdanga, Italy-i taruba hopta Egypt security force nungi ketdangser ana asadang tenzüktsü lemtetogo, shirnok Regeni samaba ken o nung densema lir ta tongloktsüogo, ta judicial source tem ajanga Yangtepnü metetdaktsü.
Italy nung parliament lower house tir-i ashiba agi, Iba ken o bentettsü asoshi Cairo nung temelenshi kecha bener maru tashi Egypt parliament den tesendaktep ajak anena atatsü.
Iba nung telangzüba agüja Egypt parliament-i Rogonü, iba osang ya taoksatsüka lir ta ashiba den iba ken o bushisüngdang takaraba nung temdaktsütsü asoshi agiba jenjang ka lir, ta ashi.