Regional kisüng menokdakteter !

Nagaland nung Naga nunger asoshi yimten nung tamakok kaji Naga nungertemi Naga nunger dak apet tentetba Regional Party kata Indian National Party medeni menokdaktetba ya asütsü. Asenoki kanga bangpetsa jembibaji Naga nunger ya India nunger masü ta jembir saka asenoki Indian Natinoal Political Party ka teyari magiang Naga Regional Political Party ka menokdaktetbaji India nunger tsüngdang tamakok dang masü saka maksü amai asenoki bilemtsüla. Iba kasaji asenok aikati India telongjem kübok Nagaland state akümba ya aitsür saka asenok yimten yimsüsürtembo ajak Indian National Party nung adener. Ashiko, iba jagi asenoki meteta aser memeteti Delhi nung amenertem jagi asenok ya kanga menüja alitsü. Ashiko, iba jagi balaka Naga yimten tebilemtsü ya tang tashi melatetter asütsüa akok, kechiyong asenoki asenoksasa yimten nung akümmakettsüsa litetter. Aiben asenoki Delhi nungi High Command-i ashiba angaa alitsübaji tim masü ta jembir. Tetezü, National Party, Congress aser BJP ama nung adenba agi Naga nungertemi mulungba nung masü saka Delhi nungi item party High Command-i mulungba nung dang jajatsü aser inyaktsü ta shinürba alitsü. Aji shitak, kechiyong National Party nung dena yur National lenirtemi ashi mangatsübaji masü. Ajisüaka, ajak dang tamajungbaji party-bo Regional saka tashibo National party-i ashiba angaa yimsü asür ta asübaji asütsü. Naga nunger yimsüsürtem rongnung aika Nagaland nung ali tashi Regional saka Nagaland gate adenerbo National ta akümer. Tetezü, Nagaland nung ali tashi dang Naga nunger  saka Delhi tongerbo India nunger akümer. Iba ana tsüngdaji asenok Naga nunger temeten aser aküm samar. Atangji, India telongjem kübok ali tashi Indian National Party nung adenba nungji kecha tai mali, kechiyong Regional Party asüyonga, National Party asüyonga India temzüng kübok “ni India nunger senso,” ta peisasa nangzüker yimten nung shilem agir. Ajisüaka, asenoki Naga Regional Party nung adenba ya Naga nunger yimten nüchiso asoshi rarar telok ama bilemra tai asütsü aser iba jagi nübortem anisatsü. Ano, asenok National Party nung adenyonga, asenoki Naga nunger yimten tebilemtsü mali ama aser Naga nungerji tanüngba India nunger den kasasa ama bilemra, Naga nunger asoshi lendongji aji asütsü. Joko, asenok ya shibasüdirsüaka, yimten nung maongka angulen asaa masü saka tangatetba nung mapang tajung aser tamajung ajak tizükteta nokdaktsü kanga nüngdaka kümogo. Joko, Regional-sa regional aser National-sa national ta pei pei yimten telok tangatetba nung nokdaktettsüla. Atangji, India telongjem kübok ali tashi Regional Party asüyonga oagi Delhi nungbo National Party ka denbosa longjemer inyaktsüsa adoktsü, ajisüaka iba jagi Naga Regional Party tangatetba melener ta masü. Joko, Nagaland nung Naga nunger atemabo Regional aser National ta asüba ya taini tanurtem mesüshia ‘ibai ilaba aser ibai uluba’ ta tekapu nung temeyong metsü metemer melentepa sayuba amai dang kümogo. Ibaji Naga public-i amanger. Tang aser tarutsü atema Nagaland asoshi tia makatibaji aji asütsü. Yashi National nung alirtem to ajak tanübo Regional kümogo aser tanü Regional nung alirtem ya ano asüngbo National akümtsüa akok. Ibaji meteta, Naga nungertem asoshibo National aser Regional-ba ya masü saka nisung shibaibo pei lima aser nübortem jenjang tajungba kümdaktsütsü asoshi tangatetba aser temulungtetba ali, pa mesüra laji shimtsüla. Naga yimten tebilemtsü ya National mesüra Regional ta asüba agi masü saka Naga yimten meimba mulungsentsü adenertemi koktettsü aser Nagaland ya Nagaland meimba shisatsü adenertemi dang tajungba küma yanglutettsü. Aji oda, national aser regional tenüng nung pei agitsü rongsen bendenba nisung masü saka regional tashi itta nokdaktetba ajanga aser national nung shilem tajungba agitetba ajanga Nagaland takar kümdaktsütsü shisatsü, tangatetba, temetetba aser temulungtetba adener nisungang Nagaland asoshi nüngdaker. Nübortemi Tsüngrem dang asüngdanga itemji bushitsüla.