Rehman Lakhvi-i ‘voice sample’ agütsütsü memelunger

New Delhi, July 12 (Agencies): Tawa Russia, Ufa nung Ato kilonser Narendra Modi aser Pakistan Ato kilonser, Nawaz Sharif na senden mena telemtetba tajung kar agiyonga bilemba ama nükjidong mataloktsüa akok, kechiyong 26/11 Mumbai amakba nung tongti aibelensang aser LeT (Lashkar-e-Toiba) commander Zaki-ur-Rehman Lakhvi indang ‘voice sample’ mangutsüsa lir.
Osang ajanga angazükba agi, Lakhvi’er prosecution team nung tongti Chaudhry Azhar-i, anti-terrorism court nung Pakistan-i temepishiba tasen ka agüja pa indang voice semple memeshitettsü, kechiyong iba ama ozüngji lateta mali, ta shiogo.
“Lakhvi indang voice sample meshitsü onükji tembangogo. 2011 küm onoki trail court nung Lakhvi indang voice sample meshia liasü saka obendanger (Malik Akram Awan)-i, aibelen tongloktsür alir ka dang nungi voice sample meshitsü temelaba agütsüba ozüng mali ta shia ibaji magizüki liasü,” ta Chaudhry-i ashi.
“Aibelen tongloktsür alir ka dang nungi voice sample meshitsü temelaba agütsüba ozüng Pakisan nung mali ta onoki tezüluba nung India nem metetdaktsüogo. Iba ama ozüngji India aser USA nunga mali,” ta paisa osangbenertem dang ashi.
Iba osang ya ajanga India mepelatsüa akok, kechiyong tawa Russia, Ufa yimti nung Shanghai Cooperation Organisation (SCO) senden aliba mapang Narendra Modi aser Nawaz Sharif na ajurua Mumbai bomb lendong ken o tekaraba nung tembangtsü asoshi bangjema liasü.
Tena senden amenba mapang linük anapronglai iba ken o tekaraba nung tembangtsü asoshi lenmang bushitsü aser voice sample meshitsü asoshi jembia liasü.
Ajisüaka aibelener ka dang nungi voice sample meshitsü temelaba agütsütsü asoshi ozüng Pakistan linük nung laleta mali ta ashiba ajanga iba ken o nung tetsükdaktsü adoktsüa akok.
LeT operations commander aser Mumbai amakba nung tongti aibelensang Lakhivi-i kari pa taküm mejungi amokmerener ta metetdaktsüba ajanga tawa Pakistani anti-terrorism court katia pa okadaki arutsü aliba thinenja liasü.
April 10 nü Lakhvi ya Adiala Jail nungi bail nung chioka liasü aser tesüiba mapang nunga okadaki aiben jaokaka pai mao.
Security Act ka kübok Lahore High Court tetuyuba nung ajemdaker pa Adiala Jail nungi chioka liasü.
Taküm April tom ka nung Islamabad High Court-i trial court dang Mumbai amakba ken o ya ita ana nungbo tembangtsü tuyua liasü. Iba mapangji temogo saka ken o junga makateti lir.
Lakhvi chiokba sülen tang pa mejangjaba tesem ka nung lir.
2008 küm November 26 nü Mumbai nung bomb aika amshia amakdang nisung 166 tashi asü aser iba ken o nung Lakhvi den nisung trok aija lir. Tangar nisung trokji – Abdul Wajid, Mazhar Iqbal, Hamad Amin Sadiq, Shahid Jameel Riaz, Jamil Ahmed aser Younis Anjum nunger lir.