Reliance Jio-i 16 million subscriber jenjang ajangogo

Mumbai, October 9 (Agencies) : Reliance Jio sayaba sülen mezüngbuba ita – September nung subscriber million 16 jenjang ajangteta ‘world record’ ka yangluogo ta osang metetdaktsü.
Jio ya 4G market nung tasen lir aser onoki alima nung telecom operator mesüra start up ajak dang nungi tekaratiba inlok, ta Reliance Jio Infocomm-i sangdong ka nung metetdaktsü.
Facebook, WhatsApp aser Skype amala dang nungi Jio-i subscriber teimba angu, ta sangdong nungsa shia lir.
“India ajungalen Jio Welcome Offer sapua agizükba atema onok kanga pelar aser tali ajemalushir. India nunger ajak data indang tashi idaktsütsü atema Jio yanglu” ta Reliance Industries (RIL) Chairman, Mukesh Ambani-i ashi.
“Nisungtemi iba ya ajitetba aser onok indang service amshiba atema pelar. Onoki customer atema bilemtsür aser anogoshia customer tem taginüba tongtsütsü meranger” ta paisa shisem.
RIL indang 42 buba annual general meeting nung Ambani-i pa indang telecom maparen tasenba ajanga mapang tatsütiba nung 100 million customers ngutettsü aser alima otsü ka yanglutsü alizüng lir ta metetdaktsü.
India kübok yimti aser jila 3,100 nung Jio-i Aadhaar-based paperless Jio SIM activation mapa tenzükogo. Iba ajanga customer temi pei indang Aadhaar number ajanga dang minute ishika tsüngda nung SIM activation process inyakteter.
“Iba maparen ya tanüngba tesem ajaklen inyaktsü aser taruba hopta ishika tsüngda mapa küma tenzüktsü” ta Jio sangdong nungsa metetdaktsü.
Taküm August ita tashi nung Vodafone indang subscriber million 200, Idea indang subscriber million 177 liasü aser Aircel indang million 89.7 liasü.
Telenor subscriber million 53.2 aser MTNL indang subscriber million 3.6 liasü. Ano külen, Bharti Airtel indang broadband base (3G+4G) million 35 aser Vodafone o Idea na senteper broadband amshir million 25 liasü.
Parnoki iba ya küm 15 jungnüa nung tongtetba lir saka Jio-i ita ka majungdang subscriber million 16 ngutetogo. Tan October tatemlen tashi nung Jio indang 4G amshir million 35 shi ajungtsü imlar aser ibaji ajanga Airtel amshirtem ajatettsü, ta industry observers-i metetdaktsü.