Reliance Jio-i sen jenjang talangtiba 4G phone sayatsü

New Delhi, January 18 (Agencies): India nung Reliance Jio ajanga temelenshi balaka arudaktsüba sülen maneni iba company ajanga India aser China nung yangluba smartphone company nem khuret tasen ka agütsütsü lir.
Reliance Jio ajanga 4G VoLTE amshitetba phone sayatsü sentong lir ta osang prokshia lir aser iba phone indnag jenjangji sen 999 aser 1,500 tsüngda nung asütsü.
Internet nung noksa anguba ajanga iba phone nung button pezü lir aser itemji tekalen ‘Jio’ button ka lir. Iba ‘Jio’ button nung kongshiba ajanga MyJio, JioTV, JioCinema aser JioMusic amala application lapoktsü südi, ta jempiteper.
Iba phone noksa internet nung inoktsüsangi iba phone indang kecha balaka rasaa shia mali saka sen 1,500 agi angutsü ta shia lir.
Nisung aikati bilemba ama Reliance Jio ajanga angati jembitsü aser data amshitsü asoshi 2017 March ita tashi atsülanga lir.
Iba sentong ya Reliance Jio Infocomm nung Chairman aser Managing Director, Mukesh Ambani ajanga 2016 December 1 nung metetdakja liasü. Iba sentong tenzüktsü sangdongba ajanga telecom industry nung sen jenjang ajemba tsütsü toktepba tali tuluba kümdagi.