Religious Census Data 2011 : Khristantem teinyaktsü wadang tulu lir

August 25, 2015 nü India nung Registrar General & Census Commissioner-i 2011 religious census data yimjak nung metetdaktsüba nung India nunger nütsüng yongsük crore 121.09 nungi Hindu nunger shilem 79.8, Muslim nunger shilem 14.2 aser Khristan tem shilem 2.34 lir ta bushitetba osang asenoki angashiogo. Iba Census ajanga India nung küm ter tsüngda tamangba yimsü tsütsü nütsüng timba renlokbaji Muslim nunger lir ta sayuogo. 2001 nungi 2011 tashi nung Muslim nunger 0.8 % shi inlok aser ibaji ajanga küm ter tsüngda Muslim nunger crore 13.8 aliba nungi crore 17.22 jungogo. Ajisüaka, iba religious census nung Muslim nunger dak alaka tanüngba tamangba yimsütem nütsüng ajema akümba bushitetogo aser tesasatsükaji asenok Khristan tamangertem ajema akümba osang lir. 2011 religious census data ajanga India nunger nütsüng yongsük rongnung Hindu nunger nisung crore 96.63 (79.8 per cent); Muslim nunger crore 17.22 (14.2 per cent); Khristan nunger crore 2.78 (2.34 per cent); Sikh nunger crore 2.08 (1.7 per cent); Buddhist nunger crore 0.84 (0.7 per cent); Jain nunger crore 0.45 (0.4 per cent), tanga tamangba yimsütem (ORP) crore 0.79 (0.7 per cent) aser tamangba yimsü malirtem crore 0.29 (0.2 per cent) liasü ta bushitetogo. 2011 religious census osang angashidang mezüngbo mamangjai bilem aser census agirtemi Khristan tamangertem aliba tesemtem nungang nütsüng junga mebushi asü ta rata bilem. Asenoki reprangdangra Khristan arogo ajaki amai mission mapa inyaker aser mamangertem Yisu Khrista amangdaktsütsü atema India nung dang masü saka bendanglima balala nung missionary temi yoka mapa jenti inyaker. Süra kodaser India nung Khristan nütsüng yongsük merenloktsü? Timba akümtsü ang ashi kodaser tajemba akümtsü? ta asüngdanger.  Tesüiba küm 30 tashi India nunger Khristan tamangertem nütsüng yongsük yongrü ka nung dang aliba bushitetogo aser iba ya asenok tamangertem asoshi tebilemtsü khuret tulu ka lir.  Iba onük ya Khristan tamangertemi kanga süoki ia agitsüla aser nütsüng timba renloka aotsü atema mapa talila inyaktsü nüngdaker. India nung Khristan tem timba ser aliba state tem – Nagaland, Mizoram, Meghalaya nungertemi linük nung Khristan tamangertem renloka aotsü atema sentong tajung yanglua inyaktsüla. Talisa Nagaland nunga Nagaland Baptist Churches Council (NBCC) kübok Nagaland Missionary Movement (NMM)-i ketdangsüa India kübok tesem balalai missionary tem ano talila yoktsüla aser mamangertem Khrista dangi anir arutsü merangtsüla. Nagaland nung aliba arogotem aser talisa Aor arogo aika mission dak rangloker inyakba angur aser kanga meranga inyakdar, ajisüaka asenok tanela nung aser tangatetba nung tali kümkümshitsü nüngdaker aser Khristar arogo tuluba kümdaktsütsü atema bendanga agütsüshir inyaktsüla. Tenüng atema masü saka temulung taroktiba nungi mission angateta inyaktsüla aser Pa tali sentsüwangshitsü asoshi mamangertem anir arudi. Taruba India religious census data nungbo Khristan tamangertem tesüngmangtsüka renlokba bushitettsüsa asenoki meranga nütsüng anir arutsü merangdi.