Renault-i sen Rs. 2.57 lakh alang ‘Kwid’ gari sayaogo

New Delhi, September 24 (Agencies): France nung gari yanglur tetsüdi, Renault-i mezüngsüa, Brihostibar nü India nung Rs. 2.57 lakh alang ‘Kwid’ gari sayaogo. Iba gari ya ex-showroom, Delhi jenjangbo Rs. 3.53 asütsü.
“Onok ya gari sayar masü saka tensa tasen ka sayarba lir. Kwid gari sayaba den külemi onoki gari industry nem jenjang tasen ka lapoktsür. Tang tangbo gari kecha agia Kwid den mateshitettsü,” ta India nung Renault CEO aser Managing Director Sumit Sawhney-i osangbenertem dang metetdaktsü.
Kwid yangluba ajanga Renaul-i India nung gari tila ayokba tarensen nung shilem 25 tongtetogo.
Kwid ajanga kanga junga amenteter aliba Maruti Suzuki aser Hyundai company tem den tokteptsü tebilemba lir.
Tang Maruti Alto800 Rs. 2.52 lakh aser Rs. 3.72 lakh (ex-showroom Delhi) agi yokteper. Ano Hyundai Eon Rs. 3.10 lakh aser Rs. 4.27 lakh (ex-showroom Delhi) agi yoktepdar.
Rs. 3,000 crore shi intoka, SUV mesüka yangluba gari tila, Kwid nung 800cc petrol engine keta lir. Company-i iba gari tasenba ayoktsü asoshi India-a tesep ka ama asütsü maparen inyakdar.
Kwid gari yagi totzü (petrol) litre ka agi 25.17 kilometer jajateter ibaji ajanga linük nung aliba gari ajak dang nungi totzü tajemba atsükba gari ibai kümogo.
Iba gari ya ali nung-i 180 mm pila ajungketer aser khen nung totzü litre 300 enokteter. Iba den külemi “Media Nav system & digital instrument cluster” atema ‘touchscreen’ inch tenet enokja lir.