Rengma & Zeliangrong Council, Assam ajanga NH nungittsü ayongzüker

Kohima, Luroi/August 29 (TYO): Assam nung aliba Rengma aser Zeliangrong nüburtemi arütsü alema orr aliba Naga nunger dang lungjemer Naga Hoho nungita tashi itshidaktsütsü ayongzüka liasü.

Assam, Manipur, Nagaland, Arunachal aser Burma nung nisungi yangluba arütsü liaka kin ajunga lenirtemi maneni Naga Hoho den nokdaktsü aser nungittsü ajungshi.

Rengma and Zeliangrong Council, Assam ajanga sangdong ka nung ashiba agi, kati ka asoshi aria bilemja inyaktsü, Naga nunger kibong tanaben yanglushitsü aser Naga System wazüka yua sobaliba aser yimtenren temaba jenjangi ajungkettsü nükjidong nung Naga Hoho ya Naga nungeri March 11 aser 12, 1998 nung Zunheboto nung tenzüka liasü.

Naga nunger telok balala tsüngta rara adoka aliba tensa azüoktsü aser angateteptsü atema Naga Hoho-i tongtipang shilem agia lir. State balala tsüngta nisungi yangluba arütsü liaka tebendang makai Naga Hoho-i Naga nunger kin 39 lungjemdaktsütsü asoshi maparen anir tenzük. Indo- Naga yimten ken o jembishinüba nung Naga Hohoi shilem agiba atema temolung süa agizüker aser iba tangatetep ken o nung Naga nunger aliba tesem ajunga adentsü amanger, ta sangdong ajanga ashi.

Region aser state arütsü mebendangi kin balala nungi lokti tentet teyari aser tashi ajanga Naga Hoho-i ken o balala nung shilem agia arur.

April 18, 2009 nü Deputy Speaker, H.K. Zhimomi-i anir Naga Hoho ketdangsürtemi Haflong N.C. Hills semdanga liasü. Iba mapang Dimasas (Kacharis) aser Zeme Naga tsüngta mangatetep adoka liasü, ta ashi.

Iba mapang Naha Hoho-i senotsü, rongsen aser shisatsü agi yaria liasü. Iba dak sendakba ken o nung Zeliangrong Baudi ajanga N.C. Hills nung yimjung tanaben lidaktsütsü atema June 29, 2009 nü Dimapur yimti nung rally ka ayongzüka liasü, kong Naga Hoho-ia shilem agia N.C. Hills nung aliba Naga nunger takum kumzüka ayutsü atema India Ato Kilonser dangi tezüluba ka yoka liasü.

Ano 2014 küm Karbi Anglong nung kin balala tsüngta mepetmesü adoka liasü, aser iba mapangjia Naga Hoho-i tongti shilem agia district nung yimjung tanaben lidaktsü, ta ashi. Anungji onoki Naga Hoho dang kanga pelar.

“Nagaland telungzük aser tezülen Naga nunger aliba tesem ajunga nung yakyaka inyaksangshiba lokti tentet tuluji Naga Hoho ya dang ta Assam nung aliba Naga nungertemi amanger,” ta sangdong ajanga ashi.

Anungji nüburtem mangmangtsüsa aser tang aliba Naga Hoho den lenmang balala nung jajatsüsa lokti tentet kecha menungittsü, ta Assam nung aliba Rengma aser Zeliangrong council ajangasa ashi.