Renphamo Ezung-i Naga Chef Season-4 nung takok nguogo

Dimapur, December 10 (TYO) : Amsang yanglur aser tang Exotic School of Cooking Dimapur nung teinyakdak, Renphamo Ezung-i tan Hornbill Festival mapang 4buba Naga Chef final tetoktepba nung nisung asem den kanga sashia toktepba sülen mezüngbuba jenjang nung takok nguogo.
Kisama Hornbill Festival nung sorochioktsü toktepertemi final round ana atongtsü atema culinary round, pressure task, knowledge round aser innovation round tem nung toktepa liasü. Tesüsa buba final round ana nung tetoktepertemi Naga chef food court nung aliba tejaokertem asoshi ‘full Naga thali’ sorochioktsü.
Iba tetoktepba nung shilem agirtem dak chef aser entrepreneur akümtsüsa sorochioktsü sempet ali mali metettsü atema tetoktepba aika agia liasü.
Iba sentong ya Nagaland nung kechi komala chiyungtsütem achir ibaji metetdaktsütsü aser junga agizükdaktsütsü nükjidong nung ayonga agiba lir. Naga nunger Chef temi alemli mapang nungi asen nüburtemi chiyunga aruba chiyungtsütem wazüka yuner aser aji alima nema chidangdaktsüner.
Naga Chef Season -4 nung takok angur nem sen lakh 3 aser final tongtetertem asemprong shia nem sen 25,000 senpettem agütsü.
Naga chef tetoktepba ya Department of Tourism, Government of Nagaland-i nungita Synergy Group Enterprise-i ayongba lir.