New Delhi, January 11 (Agencies) : January 26 nü Republic Day benjungmung atongtsü lia Delhi nung sepai talila 10,000 tashi mapa lemzüktsüogo.
Taküm Republic Day benjung nung tongti tesemdangerji France Tir Francois Hollande asütsü.
Kiralongrartemi Pathankot IAF base amakdang sepai 7 tashi kahsetba lendong ataloker hopta ka lir külen linük yimtiba nung paramilitary forces talila mapa lemzüktsüogo.
“Republic Day atongtsü lia aser France Tir tongti tesemdanger ama shilem agiba mapang Delhi nung security tali akangshitsü” ta Home Ministry ketdangser kati metetdaktsü.
2014 Republic Day mapang New Delhi nung paramilitary forces company 50 tashi mapa lemzükja liasü aser 2015 nung US Tir Barack Obama-i tongti tesemdanger ama shilem agidangbo sepai company 95 mapa lemzüktsü.
Taküm sorkari Delhi nung paramilitary personnel company 100 mapa lemzüktsütsü telemtetba agiogo. Pathankot nung kiralongraba mapa atalokba sülen Delhi nung kiralongraba mapa inyaktsü akok ta kümdanga alitsü osang sangdongogo, kechiyong intelligence osang kar ajanga Delhi-i kiralongrar ana arua lir ta angazüker, ta Home Ministry ketdangserisa ashi.
Kiralongrartemi Pathankot air base amakba jakdang, central security agency temi Pakistan nungi Indo-Pakistan arrtsü adena kiralongrar 8-10 shi ka linük telungi aitogo ta osang sangokja liasü.
Iba mapang Punjab sorkaria Pakistan nungi kiralongrar 15 shi arrtsü adena aitogo ta osang metetdakja liasü.
Osang angazükba agi, kiralongrar kar maongka agitsü atema ata lir aser iba jagi sorkari France Tir Hollande arudang lendong kecha matalokdaktsünür, kechiyong yaküm November 13 nü Paris nung kiralongrar 7-i amakdang nisung 130 tashi kahsetba lendong atalokogo.
Ali nung sepaitem mapa lemzüktsüba dak alia sorkari anünglen asoshi anti-aircraft gun aser Delhi kübok tesem aika nung no-fly zone tenokdangba agütsütsü.
You must be logged in to post a comment Login