Republic Day nü Northeast India nung bomb 9 apok

Guwahati, January 26, 2017 (Agencies): India nung 68 buba Republic Day amongdang North-east nung bomb teku apok. Brehostibarnü Manipur nung bomb ana aser Assam nung tenet apok, ajisüaka tang tashi nung nisung yiruba osang kecha mali.
Osang ajanga ashiba agi, Brehostibar nü Assam district pezü nung item bomb apok. Charaideo district nung bomb asem, Sivasagar district nung ana, Dibrugarh aser Tinsukia district nung kaka apok.
Iba mapa ya United Liberation Front of Asom (ULFA)-i inyak, ta police-i temolung melemi bilemba osang ajanga ashi. Osang ajanga ashiba agi 4buba bomb Nazira, Sivasagar district nung apok, iba sülen 6buba ghonda ka shi lir Dibrugarh nung parade ground nungi meter 500 shi pilar apok. Tinsukia district nung Brahmaputra ayong nung tang teyangludak apu tongshizüng nung bomb 7bubaji apok.
“Tang tashi nung tasüba mesüra teraksa kecha mali. Item bomb ji nisung maliba tesemtem nung parnok aliba jangjadaktsütsü asoshi pokdaktsü,” ta police ketdangser kati osangbenertem dang ashi.
Maneni Manipur nung Imphal anüdoklen bomb ka aser anüolen ka ta apok. Osang ka ajanga ashiba agi bomb ana atonga apok, aser iba mapaji telungpurtemi inyak südi ta temolung melemi bilemba shisem. Longru atsü ka poksaba dak alaka tang tashi nung tasüba osang kecha mali, ta police-i ashi.
Bomb ka anepdang 8:30 meta Imphal anüolen district nung Singjamei yimdak Hao Ground nung apok, aser tanabuba bomb kesa mapang shi nung Imphal anüdoklen Mantripukhri nung 69 CRPF Battalion barrack anasa apok.
R-Day sentong Kangla nung old palace complex nung Governor Najma Heptulla tongti tesemdanger ser among.
Northeast state-tem nung aliba telungpurtemi northeast nung Republic Day mamongtsü nokdang. Osang ajanga ashiba agi Ulfa telok nungi Paresh Baruah-i iba tenokdangba metetdakja nüburtem ajak Brehostibarnü ki telung nung dang alitsü asoshi metetdakja liasü.