Republican Caucus: Cruz-i Trump madak Iowa nung takok angu

Republican yimtenren telok nungi US Tir candidate, Ted Cruz-i Iowa nung agiba Tir candidate shimtsü sentong nung takok anguba sülen Iowa kübok Des Moines nung pa pusemertem den ajurutepba noksa nung angur. Cruz kinüngtsü, Heidi Cruz-a achijilen nokdaka aliba noksa nung angur. (Des Moines, February 02)

Des Moines, February 02 (Agencies): US kübok Iowa nung agiba Republican yimtenren telok nungi US Tir menden asoshi candidate shimba sentong nung US Senator, Ted Cruz-i billionaire Donald Trump den temaba jenjang anguba osang jangjaogo.

Ajisüaka, Democrat telok nungi Tir menden asoshi candidate ama tokteptsü renema alir, taoba US Secretary of State, Hillary Clinton aser Vermont nungi US Senator, Bernie Sanders napronglai kasa jenjang nguogo.

Texas yimsüsür, Cruz-i vote noklang nung shilem 28 ngua Trump den vote shilem 3½ agi temaba jenjang angu.

Republican telok nungisa, Florida Senator, Marco Rubio-ia vote shilem 23 tashi anguba osang jangjaogo.

Tan vote bendentsü sentong ya agiba sülen nüburtemi pei yimtenren telok nungi Tir candidate ka ama shilem agidaktsütsü tangatetba aser tejangraba ayuba kuli tajung angur lir.

“Tamasa Tsüngrem nem tenüngsang agütsür. Taonung takok anguba ya Iowa aser asen US linük ajunga nung takok angur lir,” ta Cruz-i metetdaktsü.

“Asen Ruplican teloki Democrat telok nungi shimba Tir candidate, Hillary aser Bernie naprongla madak takok angutsü,” ta Trump-ia metetdaktsü.

“Asen yimtenren telok rong nungi candidate tajungtiba shimtsü asoshi iba maparen inyaktepba atema kanga pelar. Asen telok aser linük jenjang tajungba kümdaktsütsü asoshi ni Senator Sanders den olepteptsü jangrar,” ta Clinton-ia metetdaktsü.

Iowa nungi tenzüka US kübok densemba state ajunga nung Republican aser Democrat telok pusemertemi pei vote agüja pei telok nungi tajungtiba aser tetemsü candidate shimtsü sentong ya taküm June ita tum tashi agitsü sentong renema lir.

Iba sentong tembang tashi nung Republican aser Democrat telok naprongla nungi candidate ka ka shima candidate ana jagi US Tir election asoshi tokteptsü.

US Tir menden asoshi candidate shimtsü sentong ya maneni New Hampshire state nung tan February ita 9 nü agitsü ayonga lir.