Repuplic Day sentong nung tongti tesemdangertem nem tetuyuba kar agutsü

Kohima, Aenjei 24 (TYO): Administrative Headquarters balala nung Republic Day anogomong sentong nung kanga tongtibang nisungtem tongti tesemdangertem dak sendakba nung Election Commission of India tetuyuba nung Home department-i sangdong ka ajanga, state sorkar nung Minister temi pei district mesüra constituency dak alia tanga tesem nunga tongti tesemdanger asütsü Commission-i melaogo, ta metetdaktsü.
Kasa sangdong ajanga, Minister temi onük jembidang ‘Model Code of Conduct’ telatetba kübok jembitsüla aser yimtenren nüboyim atema sabang ka mekümdaktsütsüla, ta metetdaktsü.
Ibaji official sentongtem lir anungji Minister temi Republic Day benjungmong dak sendakba nung duty inyaktsü, anungji iba sentong atema parnoki parnok meyong official gari amshitsü kecha tenokdangba mali, ta sangdong nungsa shia lir.
Wako atsükettsü atema VIP maliba tesemtem nung pei district nung Administrative tekolaki atsükettsü akok, ta kasa osang ajanga metetdaktsü.