Reservation ajanga Naga sobaliba inyakyim mekongshitsü: CM

Mangkolemba Town tenteter küm 25 ajungba den repsema Mangkolemba Town Council tenzüktsüba sentong nung Chief Minister TR Zeliang den Parliamentary Secretary tem aser tongtibang nisungtem külemi tanglokba noksa ka angur. (Mangkolemba, Dec. 9).

Kohima, December 09 (TYO): Tanü Nagaland Chief Minister, TR Zeliang-i, Urban Local Bodies (ULBs) nung tetsürtem nem shilem 33% wazüka yutsüba ajanga Naga nunger sobaliba dak sendakba inyakyim nung mekongshitsü, ta metetdaktsü.
Tanü Mokokchung district kübok Mangkolemba Public Ground nung Mangkolemba jila kümer küm 25 ajungba den külemi Mangkolemba Town Council tenzükba sentong nung jembidang Chief Minister-i, “Yimti/jilatem nung aliba kiyongtem nunga Naga nunger sobaliba inyakyim benoktettsü aser peipei ward/colony councils-i ibaji achaayangtettsü,” ta metetdaktsü.
CMO Media Cell sangdong ka ajanga ashiba agi, Chief Minister-isa, sorkari urban bodies dang nungi kodanga saru magitsü saka jila nung terenlok aser office atema senotsü bushitsü atema benoktsüji shimba councillors nem bendanga agütsütsü, ta ashi.
CM-isa, ULBs nung shilem 33 wazüka yutsüba ajanga Article 371(A) raksatsütsü aser Naga nunger sobaliba inyakyimtem kongshitsü ta tsübubaji shitak masü, ta ashi.
Naga nungeri maneni Nagaland Village Councils Act benshitsü aser tetsürtem atema Village Development Boards nung fund shilem 25 lemzüka yutsübaji küm 15 dak tema inyaka arur, ta paisa ashi.
“Asenoki, tebur aser tetsürtemji kasa dang aser tetsürtem atema menden wazüka yutsütsü menüngdaker ta jembira, kechiba küm aika Assembly nung tetsür MLA kata mali,” ta pai asüngdang.
Kechiba teburtemi tetsürtem town aser municipal councils nung adentsü atema tsübur ta asüngdanga pai, “Item tetsürtem ya asen kinüngtsürtem, aianutem aser jalatem lir. Asenoki councils aser municipal bodies nung linük nung tanga tesem nungi tetsürtem manioktsü,” ta ashi.
“Asenoki municipal aser town councils elections magiba ajanga 14th Finance Commission-i benokba senotsütem India sorkari magütsür,” ta Chief minister-isa shisem.