Reshikangshi ajuruba Khristantem yaritsü atema senden ka amentsü

Washington, May 5 (Agencies): Alima tesem balala nung Khristantem reshikangshi timtem ajururtem yaritsü atema Khristan lennir telok kati onüktem benoka sentong atongtsü.
Khristan lennirtemji May 10-11, 2017 anogotem Washington D.C. nung ajuruteptsü aser iba dang ‘World Summit in Defense of Persecuted Christians’ ta ajar.
‘World Summit in Defense of Persecuted Christians’ nung adentsü atema linük 130 nungi Khristan lennir 600 den tema jaokogo.
Iba sentong ya Billy Graham Evangelistic Association ajanga teyari agütsür aser parnoki tongti onük pezü atema jembitsü, ta Charisma News ajanga metetdaktsü.
Onük pezü rongnung kaji, Khristantem bendanga amshiba, tim mesüi inyakba aser reshikangshiba anema public policy ka yanglutsü aser tanabubaji Khristantem reshikangshiba linüktem dang tanga linüktem nung yimsüsürtemi tebang ia olemteptsü atema lir.
Tesem balala nung reshikangshiba anema America-i mapa tuluba inyaktsü atema President Trump aser US sorkar nung ketdangsertem ajungshitsü atema Khristantem anidentsü aser Laishiba tesayuba nung aliba ama takoksa aser timtem ajururtem yaritsü atema lir.
Tesüiba küm ka tsüngda alima nung Khristantem reshikangshiba kanga bulua kümogo. Linük balala nung tamangba yimsü anema ozüngtem takang yanglubaji noklang nung shilem 40 shi ajungket, ta Pew Research Center-i bushitetba osang metetdaktsüogo.
Rev. Franklin Graham-i ‘World Summit in Defense of Persecuted Christians’ sentong ayonger aser pai Khristantem dang ketdangsertem dang tamangba yimsü nüjiso kümzüka ayutsü atema ajungmesotsü ayongzük.
“Yimten lennirtemi tatalokba osangtem züngzünga metetdaktsünür. Alima nung reshikangshi timtem ajuruba Khristantem indang osangji jangjajangja yimjak nung metetdaktsünür” ta Rev. Franklin-isa metetdaktsüogo.