Residency colony-i Clean Election indang ‘model polling station’ asütsü nükla ayur

Dimapur, June 24 (TYO): Dimapur kübok Residency colony nung Honibarnü Clean Election atema lokti senden ka ayonga amen.
Iba senden ya Colony clean election committee-i ayongzük aser iba nung council züngsem ajak, GBs, tetsür lennirtem, lanur lennirtem aser arogo ketdangser kar dena lir.
NBCC-i clean election yimyim ayimoktsüba nung ajemdaker Dimapur nung DUCCF aser GBs union-i kiyong sasep lemsar clean election maparen inyaktsü telemtetba agi, ta tanü senden nung Council Chairman, Simon Kelio-i metetdaktsü.
Asenoki asen tensa repranger tezütanga mebilemtsüla saka tajung bilemtsüla aser pei dak rangloktsüla. Asenok kija shiai temelenshi bener arutsü asoshi nübo ka ta angateta, iba mapa nung shilem agitsüla, ta paisa ayongzük.
“Asenoki temelenshi aginüra aser temelenshi atema tenangzükba agira, melenshitsübaji takoktsü lir. Kasaji, loktiliba nung nisung shia melenshira, state ajunga melenshitsü. Temelenshiji pei dak nungi adoktsüla” ta Simon Kelio-isa ashi.
Senden nung Mrs. Amongla-i anir sarasademba mapang agi aser iba nung tesüiba election tem nung aibelena inyakbatem atema tatok meshia sarasadem.
Tanü senden nung onük kar bangzünga renem aser bangzüngtem rongnung, 2 Dimapur II A/C kübok Residency colony polling station number 65 ji Clean Election indang ‘model polling station’ kümdaktsütsüba lir.
Iba onük atema Colony clean election committee-i chichiba voter tem nem dang vote agütsüdaktsütsü aser voter temi colour voters ID card dang abentsü atema mapa inyaktsü. Maneni, polling anogo nung tantsür-tambur nem mezüng vote agütsüdaktsütsü aser chairman-i tatembangba vote agüja polling maparen tembangtsü lemtet.
Ano, CEC-i tetuyuba agütsüba sülen committee-i BLO den yaritepa E roll merüktetba mapa inyaktsü aser nisung maliba tenüng ajak agientsü atema senden nung bangzünga renem.
Senden nungsa proxy mesüra tangalen nungi arur nem vote magütsüdaktsütsü, kiyong nung lanur camp melapoktsü aser candidate mesüra par mapa inyaker dang nungi kiyonger shingaia sen meshia magitsü atema telemtetba agi.
Yimten telok aser candidate tem kibok sema senzüba aser telok balala den sendentem ayonga amentsü atema temelaba magütsütsü aser candidate kari public den senden mennüra, pa/lai council dang tama asüngdangtsü atema tanü senden nung adenertemi lemtet.
Residency colony nung alir karidangi, temalen agüja aliba bangzüngtem alema inyakra, pa mesüra la dak nungi kiyonger nem agütsüba facility aser temetentem agientsü lemtet.
Iba temerenshiji taruba election nungang agientsü aser ibajia clean election tenangzükba agiba aser mapa küma inyakba sülen ang agientsü, ta senden nungsa bangzünga renem.