Resorts World Manila lendong nungi tasümang 36 ngutet

Manila, June 02 (Agencies): Philippine yimtiba Manila nung aliba casino aser hotel complex nung mejangjaba nisung kati Hokulbar anepdang injang khashiba tesem nungi nisung 36 tasümang ngutetogo.
Asür rongnung timbaka iba mejangjaba nisung-i casino table tem nung mi senloktsüba mokozü ajanga tangu mesashiteti asü, ta ketdangser temi osangbener dang ashi.
Resorts World Manila nung aliba casino nung mejangjaba nisung ka yagi Hokulbar anepdang yakta injang khaloktsü tenzük.
Ketdangsertemi mezüngbo iba lendong nung nisung asür kata mali, ta ashi saka iba lendong agütsüsang ya asüba sülen ki ajunga mita bushiba mapang tasümang 36 ya ngutet.
Islamic State (IS) temi iba lendong ya agütsü, ta tenüng agiaka, iba lendong ya rakzükraktemer mapa lir, ta ketdangsertemi ashir.
IS temi iba lendong adalokdaktsü, ta tenüng agiba osang ya Telegram ajanga ashi saka iba dak alaka tejangja osang balaka shia mali.
Iba mejangjaba nisung ya casino yagi ayatirm ajangli ait aser assault rifle prangpong nungi injang akha tenzük.
Pai injang ya nisung dak masü saka tazüngla nung akha, aser iba ajanga nisung aoksa aser tsübutep, ta Southern Police District Superintendent, Tomas Apolinario-i osangbener dang ashi.
“Iba lendong nung nisung kar yiru aser kar asü, saka parnok dak injang agi kongshiba zübu mali,” ta pai-sa ashi.
Iba mejangjaba nisung-i ‘gambling’ asayaba table nung mi senoktsü aser pai bena aliba juli nung sen million $113 jenjang ‘gambling chips’ tem inok. Pai iba juli doktsür hotel aliba ki telungi jena ao.
“Pa yipden ka nung mejang aser petrol inloker blanket temelem ka agi pasasa pa longbang aser mi tsükloktsü,” ta National Police nung tekolakba, Roland Dela Rosa-i ashi.
Resorts World Manila ajanga sangdongba agi, iba nisung ya pasasa pa dak mi senloktsü aser pai-sa pa dak injang khaloktsü.
Police temi CCTV indang noksa prokshiba nung iba nisung ya süoshi tanak sübur, prangpong bener lir.
Iba lendong nung yirur alir nisung 50 dak tali mozüki nung anepaluba mapang lir.